सूरजगड, कोन्सारी आणि बोडली प्रकल्पांमध्ये विद्यार्थ्यांना प्रत्यक्ष औद्योगिक प्रशिक्षणाची सुवर्णसंधी
गडचिरोली : , दि. २२ मे : गोंडवाना विद्यापीठांतर्गत कार्यरत युनिव्हर्सिटी इन्स्टिट्यूट ऑफ टेक्नॉलॉजी (यूआयटी), अडपल्ली येथील सर्व शाखांतील प्रथम वर्ष व द्वितीय सत्रातील डिप्लोमा विद्यार्थ्यांनी **लॉयड्स मेटल्स अँड एनर्जी लिमिटेड (एलएमईएल)**च्या विविध प्रकल्पांमध्ये उन्हाळी इंटर्नशिप व औद्योगिक प्रशिक्षणाला सुरुवात केली असून, विद्यार्थ्यांसाठी उद्योगविश्वाचे दार खुले झाले आहे. दि. २० मे २०२६ रोजी परीक्षा यशस्वीरित्या पूर्ण झाल्यानंतर हा प्रशिक्षण उपक्रम सुरू करण्यात आला.
या अभिनव उपक्रमांतर्गत १८ वर्षांखालील विद्यार्थ्यांना लॉयड्स अकॅडमिक स्किल सेंटर, बोदली येथे प्रशिक्षणासाठी नियुक्त करण्यात आले आहे, तर १८ वर्षांवरील विद्यार्थ्यांना कोन्सारी व सूरजगड येथील लॉयड्स मेटल्सच्या प्रकल्पांमध्ये प्रत्यक्ष औद्योगिक प्रशिक्षणाची संधी उपलब्ध करून देण्यात आली आहे. विशेष म्हणजे, मायनिंग इंजिनिअरिंग शाखेतील विद्यार्थ्यांना सूरजगड मायनिंग प्रकल्पात नियुक्ती देण्यात आली असून, त्यांना खाण उद्योगातील अत्याधुनिक तंत्रज्ञान व कार्यपद्धतींचा प्रत्यक्ष अनुभव मिळत आहे.
इंटर्नशिपदरम्यान विद्यार्थ्यांना आधुनिक तंत्रज्ञान, उत्पादन प्रक्रिया, औद्योगिक सुरक्षा, यंत्रसामग्री संचालन आणि कार्यस्थळ व्यवस्थापन यांचे प्रात्यक्षिक प्रशिक्षण दिले जात आहे. अनुभवी अभियंते व उद्योगतज्ज्ञांच्या मार्गदर्शनाखाली विद्यार्थी तांत्रिक कौशल्य विकसित करत असून, केवळ सैद्धांतिक शिक्षणापुरते मर्यादित न राहता प्रत्यक्ष औद्योगिक अनुभवही आत्मसात करत आहेत.
विद्यार्थी या प्रशिक्षण कार्यक्रमात उत्साहाने सहभागी होत असून, त्यांना व्यावसायिक औद्योगिक कार्यसंस्कृतीचा जवळून अनुभव मिळत आहे. विद्यार्थ्यांच्या निवास व भोजनाची योग्य व्यवस्था करण्यात आली असून, प्रशिक्षण प्रक्रियेत अधिक समर्पण व सहभाग वाढावा यासाठी स्टायपेंड देण्याबाबत कंपनीकडून सकारात्मक विचार सुरू असल्याची माहिती मिळाली आहे.
हा महत्त्वाकांक्षी उपक्रम लॉयड्स मेटल्स अँड एनर्जी लिमिटेडचे व्यवस्थापकीय संचालक श्री. बी. प्रभाकरन यांच्या दूरदृष्टीपूर्ण नेतृत्वामुळे साकार झाला आहे. विद्यार्थ्यांनी केवळ पुस्तकातील ज्ञानावर न थांबता व्यावहारिक औद्योगिक अनुभव, तांत्रिक प्राविण्य आणि कौशल्य विकास साधावा, यावर त्यांनी सातत्याने भर दिला आहे. विशेषतः गडचिरोलीसारख्या दुर्गम व आदिवासी जिल्ह्यातील विद्यार्थ्यांसाठी शिक्षण आणि उद्योग यांच्यात मजबूत दुवा निर्माण करण्यासाठी कंपनी कटिबद्ध असल्याचे दिसून येते.
यूआयटी अडपल्लीच्या प्रगतीसाठी लॉयड्स मेटल्सने सातत्यपूर्ण सहकार्याची भूमिका निभावली असून, ग्रामीण व आदिवासी भागातील विद्यार्थ्यांना गुणवत्तापूर्ण तांत्रिक शिक्षणासोबत रोजगाराभिमुख प्रशिक्षण व मौल्यवान औद्योगिक अनुभव मिळावा, यासाठी कंपनी सातत्याने प्रयत्नशील आहे.
हा इंटर्नशिप कार्यक्रम शैक्षणिक अध्ययन आणि औद्योगिक कार्यपद्धतीतील दरी कमी करण्यासाठी महत्त्वपूर्ण ठरणार असून, विद्यार्थ्यांचा आत्मविश्वास वाढविणे, रोजगारक्षमता मजबूत करणे आणि त्यांना यशस्वी अभियांत्रिकी करिअरसाठी सक्षम बनविणे हा यामागील मुख्य उद्देश आहे. विद्यार्थ्यांनी, पालकांनी व प्राध्यापकांनी या उपक्रमाचे स्वागत केले असून, भविष्यात अशा उद्योग-संलग्न प्रशिक्षण कार्यक्रमांचा मोठा लाभ होईल, असा विश्वास व्यक्त केला आहे.
