🔥 भरउन्हात नवरदेवाची तब्येत बिघडली; डॉ. अशोक नेते धावले मदतीला! 💧 माणुसकीचे दर्शन — रुग्णालयात जाऊन केली विचारपूस

💧 माणुसकीचे दर्शन — रुग्णालयात जाऊन केली विचारपूस

गडचिरोली/सावली | दि. १९ एप्रिल २०२६ सावली तालुक्यातील व्याहाड बुज येथे पार पडलेल्या एका विवाह सोहळ्यात भरउन्हात नवरदेवाची अचानक प्रकृती बिघडल्याची घटना घडली. या प्रसंगी माजी खासदार डॉ. अशोकजी नेते यांनी तात्काळ दखल घेत थेट रुग्णालयात धाव घेत माणुसकीचे दर्शन घडवले.

इंदिरानगर (गडचिरोली) येथील भाजपचे ज्येष्ठ नेते नरेशजी हजारे यांच्या मुलाचा विवाह सोहळा मोठ्या उत्साहात पार पडत होता. यावेळी प्रमुख पाहुणे म्हणून उपस्थित असलेल्या डॉ. नेते यांनी नववधू-वरांना शुभाशीर्वादही दिले. मात्र, सोहळा संपताच कडक उन्हामुळे नवरदेवाला त्रास जाणवू लागला आणि त्यांची प्रकृती अचानक खालावली.

परिस्थितीची गंभीरता लक्षात घेऊन नवरदेवाला तातडीने डॉ. अमित बाटवे यांच्या रुग्णालयात दाखल करण्यात आले. ही माहिती मिळताच डॉ. अशोकजी नेते यांनी क्षणाचाही विलंब न करता थेट रुग्णालय गाठले. त्यांनी डॉक्टरांशी सविस्तर चर्चा करत नवरदेवाच्या प्रकृतीची विचारपूस केली.

दरम्यान, दुसऱ्या दिवशी नियोजित असलेल्या स्वागत समारंभामुळे कुटुंबीयांमध्ये चिंतेचे वातावरण होते. यावर डॉ. नेते यांनी डॉक्टरांना योग्य व तातडीचे उपचार देण्याच्या सूचना करत, “उद्या महत्त्वाचा कार्यक्रम असल्याने नवरदेव लवकर बरा व्हावा,” अशी अपेक्षा व्यक्त केली.

यावेळी त्यांनी उपस्थित नागरिकांनाही वाढत्या उष्णतेच्या पार्श्वभूमीवर आरोग्याची काळजी घेण्याचे आवाहन केले.

या प्रसंगी किसान मोर्चाचे प्रदेश सचिव रमेश भुरसे, कामगार मोर्चा जिल्हाध्यक्ष सुधाकर पेटकर, माजी ग्रामपंचायत सदस्या पुष्पा ठाकरे, विजय सातपैसे, प्रशांत अलपटलावार, रमेश सहारे, किसन ठाकरे तसेच हजारे, सोनटक्के व बावनकर परिवारातील सदस्य मोठ्या संख्येने उपस्थित होते.

राजकारणापलीकडे जाऊन कार्यकर्त्याच्या सुख-दु:खात धावून जाणाऱ्या डॉ. अशोकजी नेते यांच्या या तत्परतेचे परिसरात सर्वत्र कौतुक होत आहे.