🟥 ‘ऑपरेशन सापळा’ यशस्वी! आलापल्ली जंगलात 12 शिकारी रंगेहात जेरबंद शेकरू, हरियालसह दुर्मिळ वन्यजीवांची शिकार उघड; वनविभागाची धडक कारवाई

🟥 शेकरू, हरियालसह दुर्मिळ वन्यजीवांची शिकार उघड; वनविभागाची धडक कारवाई

📍 गडचिरोली / आलापल्ली मौल्यवान वनसंपत्ती आणि जैवविविधतेसाठी प्रसिद्ध असलेल्या आलापल्ली जंगलात उन्हाळ्याच्या पार्श्वभूमीवर सक्रिय झालेल्या शिकारी टोळीवर वनविभागाने मोठी कारवाई करत तब्बल 12 जणांना रंगेहात जेरबंद केले आहे. या कारवाईत महाराष्ट्राचा राज्य प्राणी शेकरू , उडणारी खार आणि राज्य पक्षी हरियाल, तसेच दयाळ (रॉबिन) पक्षी यांची शिकार उघड झाल्याने वन्यजीव संरक्षणाच्या दृष्टीने गंभीर प्रश्न निर्माण झाला आहे.

आलापल्ली वनविभाग अंतर्गत येणाऱ्या वनपरिक्षेत्रातील खंड क्रमांक 10 मध्ये ही कारवाई करण्यात आली. गुप्त माहितीच्या आधारे वनकर्मचाऱ्यांनी अचूक नियोजन करत सापळा रचला आणि एटापल्ली तालुक्यातील उडेरा येथील 12 जणांच्या टोळीला शिकार करत असतानाच वेढा घालून ताब्यात घेतले.

या कारवाईदरम्यान आरोपींकडून शिकारीसाठी वापरण्यात येणारे साहित्य—हातगुलेर, मातीचे गोळे—जप्त करण्यात आले असून, घटनास्थळावरून 5 दुचाकी वाहनेही ताब्यात घेण्यात आली आहेत.

अटक केलेल्या सर्व आरोपींना आलापल्ली येथील विश्रामगृहात आणण्यात आले असून त्यांची कसून चौकशी सुरू आहे. या प्रकरणात आणखी कोणाचा सहभाग आहे का, तसेच इतर वन्यजीवांची शिकार करण्यात आली आहे का याचा तपास सुरू असल्याची माहिती सहाय्यक वनसंरक्षक शिशुपाल पवार आणि वनपरिक्षेत्र अधिकारी गणवीर यांनी दिली.

या धाडसी कारवाईत वन कर्मचारी हरीश दहागावकर, दत्ता सुरवसे, पूनम बुद्धावार, शंकर रंगूवार आणि निलेश टेकाम यांनी अत्यंत सतर्कता व धाडस दाखवत मोठे यश मिळवले.

👉 वनविभागाच्या या ‘ऑपरेशन सापळा’मुळे शिकारी टोळ्यांमध्ये भीतीचे वातावरण निर्माण झाले असून, जंगलातील बेकायदेशीर शिकारीवर मोठा आळा बसण्याची चिन्हे दिसत आहेत.