🎒 आमदार झाले ‘बालसखा’; साखेरा अंगणवाडीत रंगली आनंदाची ‘बालमैफील’ 🎶

राजकारण विसरून चिमुकल्यांत मिसळले; शिक्षण, आरोग्य आणि संस्कारांचा दिला संदेश

गडचिरोली : राजकारणाच्या व्यस्त दिनक्रमातून वेळ काढत गडचिरोलीचे आमदार डॉ. मिलिंद नरोटे यांनी धानोरा तालुक्यातील साखेरा येथे मानवतेचा आणि आपुलकीचा अनोखा नमुना सादर केला. नियोजित कार्यक्रमासाठी जात असताना त्यांनी ग्रामपंचायतीजवळ सुरू असलेली अंगणवाडी पाहताच गाडी थांबवली आणि थेट चिमुकल्यांच्या विश्वात प्रवेश केला.
खिडकीतून दिसणारी निरागस चेहरे आणि बालकांचा किलबिलाट पाहून आमदारांना स्वतःला रोखता आले नाही. कोणताही राजकीय आडपडदा न ठेवता ते मुलांच्या वर्तुळात जाऊन बसले आणि क्षणातच ‘आमदार’ नव्हे तर ‘बालसखा’ बनले.

📚 निरागस गप्पांपासून पाढ्यांपर्यंत…
सुरुवातीला मुलांशी नावं, ओळखींच्या गप्पा रंगल्या. पुढे ही मैफील पाढे, बाराखडी आणि छोट्या प्रश्नोत्तरांपर्यंत पोहोचली. आमदारांनी विचारलेल्या प्रश्नांना मुलांनी दिलेली आत्मविश्वासपूर्ण उत्तरे पाहून उपस्थितांनाही आश्चर्याचा धक्का बसला. त्या निरागस हास्यांनी आणि चमकत्या डोळ्यांनी वातावरण भारावून गेले.

🩺 आरोग्य, संस्कार आणि मार्गदर्शन
केवळ संवादापुरते न थांबता, डॉक्टर या नात्याने डॉ. मिलिंद नरोटे यांनी मुलांच्या आरोग्याविषयीही आस्था व्यक्त केली. अंगणवाडी सेविका निर्मला कुमरे यांच्याशी चर्चा करून मुलांची उपस्थिती, पोषण आणि चांगल्या सवयींबाबत मार्गदर्शन केले. तसेच ‘CRY’ संस्थेच्या प्रतिनिधींशी संवाद साधताना गरोदर मातांचा आहार, बालसंगोपन आणि आरोग्याच्या बाबतीत महत्त्वपूर्ण सूचना दिल्या.

या प्रसंगी रमेश भुरसे, साजन गुंडावार, अनिल पोहनकर, सारंग साळवे, अविनाश पोरेटी आणि राकेश दास आदी मान्यवर उपस्थित होते.

❤️ ‘तो’ क्षण ठरला संस्मरणीय

राजकारणाच्या चौकटीबाहेर येऊन जेव्हा लोकप्रतिनिधी थेट सामान्य माणसांमध्ये, विशेषतः चिमुकल्यांमध्ये मिसळतो, तेव्हा समाजात विश्वास आणि आपुलकीची वीण अधिक घट्ट होते. साखेराच्या त्या चिमुकल्यांसाठी हा दिवस आनंदाची पर्वणी ठरला, तर आमदारांसाठी एक अविस्मरणीय अनुभव ठरला.

👉 “मुलांमध्ये मिसळल्यावर खऱ्या आनंदाची जाणीव होते,” असा संदेश या आगळ्यावेगळ्या भेटीतून उमटला.