🚌 अहेरी–सिरोंचा मार्गावर ‘भंगार’ बससेवेचा कहर! प्रवाशांचा जीव मुठीत; महामार्ग अपूर्ण, बस वारंवार बंद पडत 🚧

🚌 अहेरी–सिरोंचा मार्गावर ‘भंगार’ बससेवेचा कहर!
प्रवाशांचा जीव मुठीत; महामार्ग अपूर्ण, बस वारंवार बंद पडत 🚧

गडचिरोली (अहेरी) : अहेरी आगाराकडून अहेरी–सिरोंचा मार्गावर सुरू असलेली बससेवा सध्या प्रवाशांसाठी डोकेदुखी ठरत असून, जुनाट व जीर्ण अवस्थेतील बसमुळे प्रवाशांना जीव मुठीत घेऊन प्रवास करावा लागत आहे. बस नेमकी कुठे आणि कधी बंद पडेल याचा काहीच नेम नसल्याने नागरिकांमध्ये संतापाची भावना व्यक्त होत आहे.

या मार्गावरील राष्ट्रीय महामार्ग ३५३C चे काम गेल्या चार वर्षांपासून सुरू असले तरी अद्याप पूर्ण झालेले नाही. शंभर किलोमीटरच्या या मार्गावर अनेक मोठ्या कंपन्यांचे कंत्राटदार कार्यरत असूनही रस्त्याची अवस्था अत्यंत दयनीय आहे. अनेक ठिकाणी अर्धवट काम, खड्डे आणि धुळीचे ढग यामुळे प्रवास अधिकच धोकादायक बनला आहे.

अशा परिस्थितीत अहेरी आगारातून सुटणाऱ्या बस वारंवार बंद पडत असल्याच्या घटना समोर येत आहेत. अहेरीहून जिमलगठ्ठाकडे जाणारी बस मार्गातच बंद पडल्याच्या घटना नव्या नाहीत. त्यामुळे भर उन्हात प्रवाशांना तासन्‌तास रस्त्यावर थांबावे लागते. महिलांपासून ज्येष्ठ नागरिकांपर्यंत सर्वांनाच याचा मोठा त्रास सहन करावा लागत आहे.

दरम्यान, या मार्गावर चारचाकी, दुचाकी किंवा इतर वाहनांनी प्रवास करणाऱ्यांचीही अवस्था काही वेगळी नाही. अपूर्ण रस्ता आणि धोकादायक परिस्थितीमुळे प्रत्येक प्रवासी आपला जीव मुठीत घेऊन प्रवास करत असल्याचे चित्र आहे.

प्रवाशांच्या सुरक्षिततेचा प्रश्न ऐरणीवर असताना अहेरी आगार प्रशासन आणि संबंधित यंत्रणा मात्र उदासीन असल्याचे दिसून येत आहे. त्यामुळे बससेवेची गुणवत्ता सुधारावी, नवीन बस उपलब्ध करून द्याव्यात तसेच महामार्गाचे काम तातडीने पूर्ण करावे, अशी जोरदार मागणी नागरिकांकडून होत आहे.