🟥 “डॉ. बाबासाहेब आंबेडकरांच्या विचारांनीच देशात समानतेची क्रांती” – आ. डॉ. धर्मराव बाबा आत्राम

🟨 अहेरीतील एस. बी. महाविद्यालयात सामाजिक समता सप्ताहाचा उत्साहात शुभारंभ

गडचिरोली, दि. ८ एप्रिल : भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांच्या विचारांमुळे देशात सामाजिक, राजकीय आणि आर्थिक समानतेची भक्कम पायाभरणी झाली आहे. त्यांच्या कार्यामुळेच सर्वसामान्यांना सन्मानाने जगण्याचा अधिकार प्राप्त झाला आहे, असे प्रतिपादन आमदार डॉ. धर्मराव बाबा आत्राम यांनी केले.

ते अहेरी येथील श्री. शंकरराव बेझलवार (एस. बी.) महाविद्यालयात राष्ट्रीय सेवा योजना (NSS) विभागामार्फत आयोजित सामाजिक समता सप्ताह कार्यक्रमाच्या उद्घाटनप्रसंगी बोलत होते.

कार्यक्रमाच्या अध्यक्षस्थानी प्राचार्य विजय सोमकुंवर होते. यावेळी सिनेट सदस्या तनुश्रीताई आत्राम, प्रमुख वक्ते सुरेंद्र अलोणे, सामाजिक कार्यकर्ते अरुण मुक्कावार, तसेच राष्ट्रीय सेवा योजना कार्यक्रम अधिकारी प्रा. गजानन जंगमवार यांची प्रमुख उपस्थिती होती.

उद्घाटनपर भाषणात आ. आत्राम यांनी सांगितले की, शिक्षण हेच खरे परिवर्तनाचे साधन मानून डॉ. आंबेडकरांनी समाजातील विषमता दूर करण्यासाठी आयुष्यभर संघर्ष केला. त्यांच्या दूरदृष्टीतून तयार झालेल्या संविधानामुळेच देशात सर्वांना समान हक्क, संधी आणि न्याय मिळाला आहे. आज आपण ज्या लोकशाही व्यवस्थेत प्रतिनिधित्व करतो, ती त्यांच्या विचारांचीच देण असून त्यांचे उपकार कधीही फेडता येणार नाहीत, असेही त्यांनी नमूद केले.

सदर सामाजिक समता सप्ताह ८ ते १४ एप्रिल दरम्यान विविध उपक्रमांनी साजरा केला जाणार आहे. या अंतर्गत व्याख्यानमाला, जनजागृती कार्यक्रम आणि विद्यार्थ्यांच्या सहभागातून सामाजिक विषयांवर विविध नाविन्यपूर्ण उपक्रम राबविण्यात येणार आहेत.

सर्वोदय शिक्षण मंडळाचे अध्यक्ष अरविंद सावकार पोरेड्डीवार, सचिव प्रशांत पोटदुखे यांच्यासह मंडळाच्या पदाधिकाऱ्यांनी संदेशाद्वारे शुभेच्छा दिल्या.

कार्यक्रमाचे प्रास्ताविक प्रा. गजानन जंगमवार यांनी केले, तर सूत्रसंचालन प्रा. डॉ. सोनाली वाघ यांनी केले. आभार प्रदर्शन प्रा. नामदेव पेंदाम यांनी मानले. कार्यक्रमास प्राध्यापकवर्ग, प्रतिष्ठित नागरिक आणि विद्यार्थी मोठ्या संख्येने उपस्थित होते.