🚨 लग्नाच्या वऱ्हाडावर काळाचा घाला! ट्रॅव्हल्स-स्कॉर्पिओच्या भीषण धडकेत ५ ठार, १२ गंभीर 🚨

गडचिरोली | लग्नाचा आनंदोत्सव आटोपून घरी परतणाऱ्या वऱ्हाड्यावर नियतीने क्रूर घाला घातल्याची हृदयद्रावक घटना रविवारी सायंकाळी चामोर्शी तालुक्यातील तळोधी परिसरात घडली. समोरून येणाऱ्या खासगी ट्रॅव्हल्सने स्कॉर्पिओला दिलेल्या भीषण धडकेत ८ वर्षांच्या चिमुकलीसह पाच जणांचा जागीच मृत्यू झाला, तर १२ जण गंभीर जखमी झाले आहेत. सायंकाळी सुमारे ६ वाजताच्या सुमारास नवीन पेट्रोल पंपासमोरील वळणावर हा भीषण अपघात घडला.

हास्य-विनोदाचे किंकाळ्यांत रूपांतर

मिळालेल्या माहितीनुसार, कुरुल रामपूर येथील लग्न सोहळा आटोपून १६ वऱ्हाडी स्कॉर्पिओने भडभीडीकडे परतत होते. गाडीत गाणी, हास्य-विनोद सुरू असतानाच गडचिरोलीकडून येणाऱ्या ‘प्रवीण टुर्स अँड ट्रॅव्हल्स’च्या बसने समोरासमोर जोरदार धडक दिली. धडक इतकी भीषण होती की स्कॉर्पिओचा अक्षरशः चक्काचूर झाला. घटनास्थळी रक्ताचा सडा पडला असून जखमींच्या किंकाळ्यांनी परिसर दणाणून गेला.

मृतांमध्ये चिमुकलीचा समावेश

या अपघातात कुणघडा येथील विमल कान्हुजी गव्हारे, सुमन देवाजी गव्हारे, भडभीडी येथील अनिकेत साईनाथ बरलावार आणि गट्टेगुडा येथील ८ वर्षीय आरोही मोगरकर यांचा जागीच मृत्यू झाला. ऐन बालवयातच आरोहीचा झालेला करुण अंत संपूर्ण परिसराला हेलावून गेला आहे.

१२ जखमींची प्रकृती चिंताजनक

अपघातात स्कॉर्पिओ चालक गुरुदास वासेकर यांच्यासह १२ जण गंभीर जखमी झाले आहेत. बहुतेकांच्या डोक्याला गंभीर दुखापत झाली असून त्यांची प्रकृती चिंताजनक आहे. चामोर्शी ग्रामीण रुग्णालयात प्राथमिक उपचारानंतर सर्व जखमींना गडचिरोली येथील सामान्य रुग्णालयात हलविण्यात आले. वैद्यकीय अधीक्षक डॉ. प्रवीणकुमार कीलनाके यांच्या मार्गदर्शनाखाली उपचार सुरू आहेत.

जखमींची नावे

प्रतिमा मोगरकर (३५), गुरुदेव कुणघाडकर (५५), निखिल जराते (१७), संजय वैरागडे (१७), कुणाल कन्नाके (२१), सुधाकर कुणघाडकर (६५), अमर चलाख (५७), देवाजी गव्हारे (६५), रेखा चलाख (५५), वेदांत वैरागडे (१६), करण कुमरे (१६) यांचा समावेश आहे.

रक्ताने माखल्या लग्नाच्या अक्षता

काही तासांपूर्वी हातावर मेहंदी आणि डोक्यावर अक्षता घेऊन आनंदात असलेले वऱ्हाडी अचानक मृत्यूच्या विळख्यात सापडले. महामार्गावर विखुरलेले लग्नाचे साहित्य आणि रक्ताने माखलेल्या अक्षता पाहून प्रत्यक्षदर्शींचेही डोळे पाणावले. वरातीचे रूपांतर अंत्ययात्रेत झाल्याने संपूर्ण चामोर्शी तालुक्यावर शोककळा पसरली आहे.

धोकादायक वळण ठरतेय ‘डेथ ट्रॅप’

तळोधी महामार्गावरील नवीन पेट्रोल पंपासमोरील वळण अत्यंत धोकादायक बनले असून वाहनांच्या वेगावर कोणतीही मर्यादा नसल्याने अपघातांची मालिका सुरूच आहे. प्रशासनाच्या दुर्लक्षामुळे निरपराध नागरिकांचे बळी जात असल्याचा संताप स्थानिक नागरिकांनी व्यक्त केला आहे.
या वळणावर तातडीने सुरक्षात्मक उपाययोजना करण्याची मागणी जोर धरत आहे.