🔥 “जीमलगट्टा वनपरिक्षेत्रात वनवाचा कहर; उपाययोजना असूनही आगींचे सत्र कायम” 🔥

जीमलगट्टा : दरवर्षी फेब्रुवारी ते जून या कालावधीत जंगलांमध्ये लागणाऱ्या आगींमुळे मोठ्या प्रमाणावर वनसंपत्तीचे नुकसान होत असते. मात्र यावर्षी जीमलगट्टा वनपरिक्षेत्रात वनवाचा प्रचंड कहर पाहायला मिळत असून, मौल्यवान वनसंपत्ती अक्षरशः राख झाल्याचे भीषण चित्र समोर येत आहे.

वनविभागाकडून वनवा रोखण्यासाठी विविध उपाययोजना राबवण्यात येत असल्याचा दावा केला जातो. नियंत्रण कक्ष, नोडल अधिकारी, टोल-फ्री क्रमांक, ‘वनवा मित्र’ संकल्पना, तसेच संवेदनशील भागात कर्मचारी नियुक्ती अशा अनेक उपायांची अंमलबजावणी करण्यात आली आहे. मात्र, या सर्व उपाययोजना कागदावरच मर्यादित राहिल्या की काय? असा प्रश्न आता उपस्थित होत आहे.

स्थानिक पातळीवर वारंवार आग लागण्याच्या घटनांमुळे संपूर्ण जीमलगट्टा वनपरिक्षेत्र धोक्यात आले आहे. आगीमुळे लाखो रुपयांची वनसंपत्ती नष्ट होत असून, जंगलात वास्तव्य करणाऱ्या वन्यप्राण्यांचे जीवन संकटात सापडले आहे. हजारो पक्षी, जीवजंतू आणि जैवविविधतेवरही याचा गंभीर परिणाम होत आहे.
विशेष म्हणजे, गडचिरोली जिल्हा हा राज्यात जंगलातील आगींच्या घटनांमध्ये अग्रेसर ठरत असल्याचे चित्र असून, या पार्श्वभूमीवर वनसंरक्षणाची जबाबदारी अधिक गंभीर बनली आहे.

यासंदर्भात वनपरिक्षेत्र अधिकारी, जीमलगट्टा यांनी “आग नियंत्रणासाठी आमचे प्रयत्न सुरू आहेत,” असे सांगितले. मात्र, प्रत्यक्षात वारंवार लागणाऱ्या आगींमुळे या प्रयत्नांवर प्रश्नचिन्ह निर्माण होत आहे.

मग प्रश्न असा उपस्थित होतो की — इतक्या उपाययोजना असताना जीमलगट्टा वनपरिक्षेत्रात आगी थांबत का नाहीत? यामागे मानवी निष्काळजीपणा, जाणीवपूर्वक लावण्यात येणाऱ्या आगी की प्रशासनातील त्रुटी जबाबदार आहेत? याचा सखोल तपास होणे गरजेचे आहे.

वनसंपदेचे रक्षण करण्यासाठी केवळ योजना नव्हे, तर त्यांची प्रभावी अंमलबजावणी होणे अत्यंत आवश्यक आहे. अन्यथा, जीमलगट्टा वनपरिक्षेत्रातील हिरवागार निसर्ग पुढील काही वर्षांत पूर्णपणे नष्ट होण्याची भीती व्यक्त केली जात आहे.