गोंडवाना विद्यापीठाच्या विज्ञान व तंत्रज्ञान केंद्रात थेट पानांपासून भोजनपात्र मशीन आणि मल्टी-स्पाइस ग्राइंडरचे प्रशिक्षण
गडचिरोली : दि.9/10/26 गोंडवाना विद्यापीठाच्या विज्ञान व तंत्रज्ञान संसाधन केंद्रात (STRC) थेट पानांपासून भोजनपात्र तयार करणारी मशीन तसेच मल्टी-स्पाइस ग्राइंडर वापर व तयार करण्याबाबत प्रात्यक्षिक व प्रशिक्षण उपक्रमाचे आयोजन करण्यात आले.
हा उपक्रम राष्ट्रीय नवप्रवर्तन प्रतिष्ठान (NIF) – भारत यांच्या सहकार्याने राबविण्यात आला. ग्रामीण व आदिवासी भागातील स्वयं-सहायता गट तसेच शेतकऱ्यांना कमी खर्चिक, पर्यावरणपूरक आणि उत्पन्नवर्धक तंत्रज्ञान उपलब्ध करून देणे हा उपक्रमाचा मुख्य उद्देश आहे. प्रशिक्षणादरम्यान स्थानिक पातळीवर सहज उपलब्ध कच्च्या मालाचा वापर करून थेट पानांपासून भोजनपात्र तयार करण्याची प्रक्रिया तसेच मसाल्यांचे प्रक्रिया व मूल्यवर्धन याबाबत सविस्तर मार्गदर्शन करण्यात आले. सात ओळखण्यात आलेल्या कमी खर्चिक तंत्रज्ञानांपैकी या उपक्रमात थेट पानांपासून भोजनपात्र मशीन आणि मल्टी-स्पाइस ग्राइंडर या दोन तंत्रज्ञानांचे प्रात्यक्षिक करण्यात आले. यापूर्वी आधीच दोन तंत्रज्ञानांचे प्रात्यक्षिक यशस्वीपणे केले गेले असून, उर्वरित तीन तंत्रज्ञानांचे प्रात्यक्षिक लवकरच आयोजित केले जाणार आहे. धानोरा तालुक्यातील जांभळी, जांगडा आणि खारकडी येथील एकूण २२ सहभागी प्रशिक्षणात सहभागी झाले.
सदर उपक्रमास गोंडवाना विद्यापीठाचे कुलगुरू डॉ. प्रशांत बोकारे, प्र – कुलगुरू डॉ. श्रीराम कावळे, तसेच कुलसचिव डॉ. अनिल हिरेखण, यांचे मार्गदर्शन व सहकार्य लाभत आहे. या उपक्रमाची अंमलबजावणी STRC चे मुख्य कार्यक्रम अधिकारी व प्रमुख स्वप्निल गिराडे यांच्या नेतृत्वाखाली STRC मधील वैज्ञानिक अधिकारी व त्यांच्या चमूच्या माध्यमातून केली जात आहे.
STRC तर्फे सांगण्यात आले की, अशा उपक्रमांमुळे ग्रामीण भागात स्वयंरोजगाराच्या संधी निर्माण होऊन लघुउद्योगांच्या विकासाला चालना मिळेल.
