आ. डॉ. धर्मरावबाबा आत्राम यांच्या हस्ते ‘स्नेहधर्म डायग्नोस्टिक सेंटर’चे भूमिपूजन; दुर्गम भागातील नागरिकांना मिळणार मोफत आरोग्यसेवा
गडचिरोली/गर्देवाडा, : गडचिरोली जिल्ह्यातील अतिदुर्गम तसेच छत्तीसगड सीमेवरील गर्देवाडा परिसरातील नागरिकांसाठी आरोग्यसेवेचे नवे पर्व सुरू झाले आहे. स्नेहादेवी राजे धर्मरावबाबा आत्राम बहुउद्देशीय संस्थेच्या वतीने उभारण्यात येणाऱ्या ‘स्नेहधर्म डायग्नोस्टिक सेंटर’ या महत्त्वाकांक्षी प्रकल्पाचे भूमिपूजन माजी मंत्री तथा अहेरीचे आमदार डॉ. धर्मरावबाबा आत्राम यांच्या हस्ते बुधवारी उत्साहपूर्ण वातावरणात संपन्न झाले.
युवा नेते हर्षवर्धन बाबा आत्राम आणि डॉ. मिताली आत्राम यांच्या पुढाकारातून साकार होत असलेल्या या प्रकल्पामुळे गर्देवाडा व परिसरातील दुर्गम आणि आदिवासी भागातील नागरिकांना मोफत व सुलभ आरोग्यसेवा उपलब्ध होणार आहे. आजपर्यंत या भागातील रुग्णांना वैद्यकीय तपासण्या आणि उपचारांसाठी जांबिया गट्टा तसेच इतर दूरच्या ठिकाणी जावे लागत होते. त्यामुळे वेळ, पैसा आणि शारीरिक त्रास सहन करावा लागत होता. मात्र आता अत्यावश्यक निदान सेवा आणि प्राथमिक आरोग्य सुविधा गावाजवळच उपलब्ध होणार असल्याने नागरिकांमध्ये समाधानाचे वातावरण आहे.
“विश्वास जनतेच्या वाटचालीत उज्ज्वल भविष्याची” या ध्येयवाक्याला साकार रूप देत उभारण्यात येणारे हे डायग्नोस्टिक सेंटर दुर्गम भागातील जनतेसाठी आरोग्यसेवेचे हक्काचे केंद्र ठरणार आहे. येथे विविध वैद्यकीय तपासण्या, निदान सेवा आणि आरोग्यविषयक सुविधा उपलब्ध करून देण्यात येणार असून त्यामुळे हजारो नागरिकांना मोठा दिलासा मिळणार आहे.
भूमिपूजन सोहळ्यास गर्देवाडा ग्रामपंचायतीचे सरपंच चिमरी मासू कोडो, उपसरपंच रमेश माहा, राष्ट्रवादी काँग्रेस (अजित पवार गट) एटापल्ली तालुकाध्यक्ष संभा हिचामी, भामरागड तालुकाध्यक्ष इंदरशा मळावी, संजय चरडुके, बालाजी गावडे, मनीष दुर्गे यांच्यासह स्थानिक पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
यावेळी बोलताना आमदार डॉ. धर्मरावबाबा आत्राम यांनी दुर्गम भागातील नागरिकांना दर्जेदार आरोग्य सुविधा उपलब्ध करून देण्यासाठी आपण कटिबद्ध असल्याचे सांगितले. ग्रामीण व आदिवासी भागातील नागरिकांना उपचारांसाठी दूरची पायपीट करावी लागू नये, यासाठी अशा सुविधा गावपातळीवर निर्माण करण्याचा प्रयत्न असल्याचे त्यांनी स्पष्ट केले.
विशेष म्हणजे छत्तीसगड सीमेलगतच्या अनेक गावांतील नागरिकांनाही या केंद्राचा थेट लाभ मिळणार आहे. त्यामुळे सीमावर्ती भागातील हजारो कुटुंबांसाठी हे केंद्र आरोग्यसेवेचे नवे आशास्थान ठरणार असून ग्रामीण आरोग्य क्षेत्रातील हा प्रकल्प एक महत्त्वाचा मैलाचा दगड ठरणार असल्याची भावना उपस्थितांनी व्यक्त केली.
गर्देवाड्यात आरोग्यसेवेचा नवा इतिहास; ‘स्नेहधर्म डायग्नोस्टिक सेंटर’चे भूमिपूजन
दुर्गम जनतेसाठी आमदार आत्रामांची मोठी भेट; गर्देवाड्यात उभारणार अत्याधुनिक आरोग्य केंद्र
छत्तीसगड सीमेवरील नागरिकांना दिलासा; आरोग्य सेवा आता गावाच्या दारी
जांबिया गट्ट्याची धावपळ थांबणार; गर्देवाड्यात सुरू होणार मोफत निदान सेवा
आरोग्यक्रांतीकडे दुर्गम भागाची वाटचाल; ‘स्नेहधर्म डायग्नोस्टिक सेंटर’चे भव्य भूमिपूजन
