🔥‘हीट अलर्ट’ : गडचिरोलीत उष्ण लहरचा इशारा; नागरिकांनी दुपारी घराबाहेर पडणे टाळावे!

26 ते 27 मे दरम्यान तीव्र उष्णतेचा धोका; उष्माघात टाळण्यासाठी प्रशासनाचे सतर्कतेचे आवाहन

गडचिरोली,: गडचिरोली जिल्ह्यात येत्या दोन दिवसांत उष्ण लहर ते तीव्र उष्ण लहर निर्माण होण्याची शक्यता हवामान विभागाने वर्तविल्याने जिल्हा प्रशासन सतर्क झाले आहे. प्रादेशिक हवामान केंद्र नागपूरच्या इशाऱ्यानुसार 26 ते 27 मे 2026 या कालावधीत जिल्ह्यातील काही भागांमध्ये तीव्र उष्णतेसोबतच उष्ण रात्रींची परिस्थितीही निर्माण होऊ शकते. या पार्श्वभूमीवर जिल्हा आपत्ती व्यवस्थापन प्राधिकरणाने नागरिकांना आवश्यक ती खबरदारी घेण्याचे आवाहन केले आहे.

वाढत्या तापमानाचा मानवी आरोग्यावर गंभीर परिणाम होऊ शकतो. दीर्घकाळ कडक उन्हात राहिल्यास उष्माघाताचा धोका वाढत असून वेळेत उपचार न मिळाल्यास जीवितहानी होण्याची शक्यता नाकारता येत नाही. त्यामुळे अशक्तपणा, चक्कर येणे, डोकेदुखी, शरीरात जास्त घाम येणे यांसारखी लक्षणे दिसताच तातडीने वैद्यकीय सल्ला घेण्याचे निर्देश प्रशासनाने दिले आहेत.

नागरिकांनी तहान लागली नसली तरी नियमित पाणी पिणे, घराबाहेर पडताना टोपी, छत्री किंवा ओल्या कपड्याने डोके झाकणे, तसेच दुपारी 12 ते 4 वाजेदरम्यान शक्यतो बाहेर जाणे टाळणे गरजेचे असल्याचे सांगण्यात आले आहे. हलके, सैल व सुताचे कपडे वापरण्यासोबतच प्रवास करताना पिण्याचे पाणी जवळ ठेवण्याचा सल्लाही देण्यात आला आहे.

विशेषतः उन्हात काम करणाऱ्या मजुरांनी व नागरिकांनी मध्ये-मध्ये विश्रांती घ्यावी. शरीरातील पाण्याचे प्रमाण टिकवून ठेवण्यासाठी ORS, लिंबूपाणी, ताक, लस्सी आणि कैरीचे पन्हे यांसारख्या पेयांचा वापर करावा, असे प्रशासनाने स्पष्ट केले आहे.

गरोदर महिला, ज्येष्ठ नागरिक, लहान मुले व आजारी व्यक्तींनी विशेष दक्षता घेण्याची आवश्यकता असल्याचे नमूद करण्यात आले आहे. तसेच पाळीव प्राणी व जनावरांना सावलीत ठेवून पुरेसे पाणी उपलब्ध करून द्यावे, असेही आवाहन करण्यात आले आहे.

दरम्यान, नागरिकांनी दारू, चहा, कॉफी आणि कार्बोनेटेड थंड पेयांचे सेवन टाळावे, जड व गडद रंगाचे कपडे वापरू नयेत तसेच अतिश्रमाची कामे शक्यतो टाळावीत, असे प्रशासनाने सूचित केले आहे. लहान मुले किंवा पाळीव प्राण्यांना बंद वाहनात ठेवू नये, अशीही महत्त्वाची सूचना देण्यात आली आहे.

जिल्ह्यातील नागरिकांनी हवामान विभागाच्या सूचनांकडे लक्ष देऊन उष्मालाटेपासून स्वतःचा व कुटुंबाचा बचाव करावा, असे आवाहन जिल्हा आपत्ती व्यवस्थापन प्राधिकरण, गडचिरोली यांच्या वतीने करण्यात आले आहे.