📰 2.16 कोटींची फसवणूक; शहीद जवानांच्या कुटुंबाला नोकरीचे आमिष दाखवणारा आरोपी जेरबंद

📍 गडचिरोली | दि. 22 एप्रिल 2026 शहीद जवानांच्या कुटुंबियांच्या भावनांचा गैरफायदा घेत वर्ग-1 पदाच्या नोकरीचे आमिष दाखवून तब्बल 2 कोटी 16 लाख रुपयांची फसवणूक करणाऱ्या मुख्य आरोपीस गडचिरोली पोलिसांनी अवघ्या 24 तासांत अटक करून मोठी कारवाई केली आहे. या घटनेमुळे जिल्ह्यात खळबळ उडाली आहे.

मिळालेल्या माहितीनुसार, गडचिरोली पोलीस दलातील पोलीस अंमलदार गणपत नेहरू मडावी हे सन 2013 मध्ये तोडगट्टा जंगल परिसरातील माओवादी चकमकीत शहीद झाले होते. शासनाच्या अनुकंपा तत्त्वावर त्यांच्या मुलगा सागर मडावी याने वर्ग-1 पदासाठी अर्ज केला होता.

दरम्यान, 2022 मध्ये पुण्यात स्पर्धा परीक्षेची तयारी करत असताना सागर मडावी याची ओळख ज्ञानेश्वर शिवाजी वरे (वय 30, रा. वरोडी खुर्द, ता. भोर, जि. पुणे) याच्याशी झाली. मंत्रालयात ओळख असल्याचे भासवून वरे याने सागरला उपजिल्हाधिकारी पदावर नियुक्ती मिळवून देण्याचे आमिष दाखवले.

यानंतर मंत्रालयातील अधिकाऱ्यांना पैसे देण्याच्या नावाखाली आरोपीने इतर चार साथीदारांच्या मदतीने सागर मडावी व त्यांची आई मीना मडावी यांच्याकडून वेळोवेळी रोख, ऑनलाइन व्यवहार व एटीएमद्वारे एकूण 2,16,79,100 रुपये उकळले. मात्र नोकरी न मिळाल्याने फसवणूक झाल्याचे लक्षात आल्यानंतर सागर मडावी यांनी 20 एप्रिल 2026 रोजी गडचिरोली पोलीस ठाण्यात तक्रार दाखल केली.

त्यानुसार गुन्हा क्रमांक 469/2026 अंतर्गत फसवणुकीचा गुन्हा दाखल करण्यात आला. तपासाची चक्रे वेगाने फिरवत स्थानिक गुन्हे शाखा व गडचिरोली पोलिसांनी तांत्रिक पुराव्यांच्या आधारे आरोपीचा माग काढला आणि पुणे ग्रामीण पोलिसांच्या मदतीने राजगड (जि. पुणे) येथून त्याला अटक केली.

आरोपीला न्यायालयासमोर हजर केले असता 4 दिवसांची पोलीस कोठडी सुनावण्यात आली असून इतर चार फरार आरोपींचा शोध सुरू आहे. पुढील तपास पोलीस उपनिरीक्षक विजय मुसनवार करीत आहेत.

ही धडक कारवाई पोलीस अधीक्षक नीलोत्पल, अपर पोलीस अधीक्षक एम. रमेश, कार्तिक मधीरा, गोकुल राज तसेच सहाय्यक पोलीस अधीक्षक अनिकेत हिरडे यांच्या मार्गदर्शनाखाली स्थानिक गुन्हे शाखेचे पोलीस उपनिरीक्षक समाधान दौड व त्यांच्या पथकाने पार पाडली.

👉 शहीद कुटुंबाच्या विश्वासाचा गैरफायदा घेणाऱ्या आरोपीविरोधातील ही कारवाई जिल्ह्यातील नागरिकांमध्ये समाधान व्यक्त करणारी ठरली आहे.