🔥💙 “संविधानाचा जागर वनविभागात!” प्राणहिता वनपरिक्षेत्रात डॉ.आंबेडकर जयंतीनिमित्त उद्देशिका वाचन व ३०० प्रतींचे साहित्य वाटप 💙🔥

📍 प्राणहिता वनपरिक्षेत्र | रेपणपल्ली

गडचिरोली : (प्राणहिता) भारतरत्न डॉ. बाबासाहेब भीमराव आंबेडकर यांच्या १३५ व्या जयंतीनिमित्त प्राणहिता वनपरिक्षेत्रांतर्गत विविध शासकीय कार्यालये आणि वन वसाहती परिसरात संविधान जागराचा प्रेरणादायी उपक्रम राबविण्यात आला.

दि. १४ एप्रिल २०२६ रोजी आयोजित या कार्यक्रमात संविधान उद्देशिकेचे सामूहिक वाचन व साहित्य वितरण करून बाबासाहेबांच्या विचारांना अभिवादन करण्यात आले.

रेपनपल्ली येथील वनपरिक्षेत्र कार्यालयात झालेल्या मुख्य कार्यक्रमात वनपरिक्षेत्र अधिकारी विलास कोसनकर यांनी डॉ. बाबासाहेब आंबेडकर यांच्या प्रतिमेस पुष्पहार अर्पण करून विनम्र अभिवादन केले. यानंतर उपस्थित अधिकारी व कर्मचाऱ्यांनी संविधान उद्देशिकेचे सामूहिक वाचन करत स्वातंत्र्य, समता आणि बंधुता या मूल्यांवर आधारित समाजनिर्मितीचा संकल्प केला.

या उपक्रमाचे वैशिष्ट्य म्हणजे संविधान आणि उद्देशिका जनतेपर्यंत पोहोचविण्याचा प्रयत्न. याअंतर्गत भारताच्या संविधानाच्या १०० प्रती आणि संविधान उद्देशिकेच्या २०० प्रती विविध ठिकाणी वितरित करण्यात आल्या. प्राणहिता वनपरिक्षेत्र, पोलिस स्टेशन रेपनपल्ली तसेच बामणी वनपरिक्षेत्र येथेही उद्देशिका वाचन करून साहित्य वाटप करण्यात आले.

कार्यक्रमाला परिक्षेत्रातील सर्व कार्यालयीन व क्षेत्रीय अधिकारी-कर्मचाऱ्यांची उत्स्फूर्त उपस्थिती लाभली. सर्वांनी बाबासाहेबांच्या प्रतिमेस पुष्प अर्पण करून त्यांना विनम्र अभिवादन केले.

यावेळी वनपरिक्षेत्र अधिकारी विलास कोसनकर यांनी आपल्या मनोगतात सांगितले की, “डॉ. बाबासाहेब आंबेडकर यांनी दिलेला स्वातंत्र्य, समता आणि बंधुता यांचा संदेश अंगीकारूनच सशक्त आणि न्याय्य राष्ट्राची उभारणी शक्य आहे.”

एकंदरीत, संविधानाचा जागर घडविणारा आणि सामाजिक मूल्यांची जाणीव करून देणारा हा उपक्रम प्राणहिता वनपरिक्षेत्रात विशेष ठरला.

💙 डॉ. बाबासाहेब आंबेडकर यांना जयंतीनिमित्त विनम्र अभिवादन व कोटी कोटी प्रणाम 💙