📰 “बिलासाठी तत्पर, पण सेवेत ढिलाई! आलापल्लीत महावितरणचा मनमानी कारभार; वारंवार वीज खंडितीने नागरिक त्रस्त”

📰 “बिलासाठी तत्पर, पण सेवेत ढिलाई! आलापल्लीत महावितरणचा मनमानी कारभार; वारंवार वीज खंडितीने नागरिक त्रस्त”

📍गडचिरोली : आलापल्ली परिसरात महावितरण कडून वारंवार वीज खंडित करण्याचे प्रकार सुरूच असून, नागरिकांमध्ये तीव्र नाराजी पसरली आहे.

विशेष म्हणजे, कोणतीही पूर्वसूचना न देता अचानक वीज बंद केली जात असल्याने भर उन्हाळ्यात नागरिकांना मोठा त्रास सहन करावा लागत आहे.

नियमानुसार वीजपुरवठा खंडित करण्यापूर्वी किमान एक दिवस आधी सूचना देणे अपेक्षित असताना, प्रत्यक्षात मात्र याकडे दुर्लक्ष होत असल्याचे दिसून येत आहे. दिवसातून पाच ते सात वेळा वीज खंडित होत असल्याच्या तक्रारी वाढल्या असून, यामुळे नागरिकांचे दैनंदिन जीवन विस्कळीत झाले आहे.

यासोबतच, वीज बिल वितरणातही अनियमितता असल्याचे समोर आले आहे. अनेक ग्राहकांना प्रत्यक्ष बिल मिळत नसताना, थेट मोबाईलवर बिल भरण्याचे संदेश पाठवले जात आहेत.

“बिल भरा, अन्यथा लाईन कट” अशा इशाऱ्यांमुळे ग्राहकांमध्ये भीतीचे वातावरण निर्माण झाले आहे. विशेष म्हणजे, बिल भरण्यास एक दिवस जरी उशीर झाला तरी तत्काळ वीज कनेक्शन तोडले जात असल्याच्या तक्रारीही पुढे येत आहेत.

एकीकडे सेवा देण्यात ढिलाई आणि दुसरीकडे वसुलीसाठी कडक कारवाई, या दुहेरी धोरणामुळे महावितरणच्या कारभारावर प्रश्नचिन्ह निर्माण झाले आहे. घरगुती कामे, विद्यार्थ्यांचे शिक्षण तसेच लहान व्यावसायिकांचे व्यवहार यावर याचा गंभीर परिणाम होत आहे.

महावितरणकडे ग्राहकांना सूचना देण्यासाठी विविध साधने उपलब्ध असतानाही त्यांचा वापर न करता मनमानी पद्धतीने कामकाज सुरू असल्याचा आरोप नागरिकांकडून केला जात आहे.

या पार्श्वभूमीवर संबंधित प्रशासनाने तातडीने हस्तक्षेप करून वीजपुरवठा सुरळीत ठेवावा, तसेच कोणत्याही खंडितीपूर्वी नागरिकांना योग्य ती पूर्वसूचना द्यावी, अशी जोरदार मागणी नागरिकांकडून होत आहे.