📰 “दुर्गम ७९ गावांत आरोग्याची धावती सेवा – मोबाईल मेडिकल युनिट ठरतेय जीवदान!”

📰 “दुर्गम ७९ गावांत आरोग्याची धावती सेवा – मोबाईल मेडिकल युनिट ठरतेय जीवदान!”

📍गडचिरोली :  अति दुर्गम आणि आरोग्य सुविधांपासून वंचित भागात नागरिकांपर्यंत थेट उपचार पोहोचवण्याचे महत्त्वपूर्ण काम ‘पी. एम. जनमन’ योजनेअंतर्गत मोबाईल मेडिकल युनिटमार्फत अहेरी तालुक्यात प्रभावीपणे सुरू आहे. THO Office Aheri यांच्या माध्यमातून ही सेवा राबवली जात आहे.

या उपक्रमांतर्गत मेडिकल ऑफिसर, स्टाफ नर्स, लॅब टेक्निशियन आणि फार्मासिस्ट अशा चार जणांची एक टीम तयार करण्यात आली असून अशा दोन टीम अहेरी ब्लॉकमधील तब्बल ७९ अति दुर्गम गावांमध्ये नियमित भेटी देत आहेत. प्रत्येक टीमला सुमारे ३०-३० गावांची जबाबदारी देण्यात आली आहे.

ज्या भागात रुग्णांना वेळेवर दवाखान्यात पोहोचणे शक्य नाही, अशा दुर्गम ठिकाणी या मोबाईल मेडिकल युनिटच्या टीम प्रत्यक्ष जाऊन नागरिकांना प्राथमिक उपचार देत आहेत. तसेच गंभीर रुग्णांना मोबाईल युनिट व्हॅनद्वारे पुढील उपचारासाठी HDS Aheri येथे रेफर करण्यातही मदत केली जाते.

दररोजच्या या दौऱ्यांमुळे अनेकांना वेळेवर उपचार मिळत असून, दुर्गम भागातील आरोग्य व्यवस्थेला मोठा दिलासा मिळत आहे. या योजनेचा अधिकाधिक लाभ घ्यावा, असे आवाहन संबंधित वैद्यकीय पथकाकडून करण्यात आले आहे.

अत्यंत दुर्गम भागातही आरोग्य सेवा पोहोचवण्याचा हा प्रयत्न नागरिकांसाठी खऱ्या अर्थाने ‘जीवदान’ ठरत असल्याचे चित्र आहे.