गडचिरोली जिल्ह्यात हिवताप निदानासाठी प्रयोगशाळा वैज्ञानिक अधिकाऱ्यांना दोन दिवसीय विशेष प्रशिक्षण
गडचिरोली : जिल्ह्यातील आरोग्य सेवा अधिक सक्षम करण्यासाठी आणि हिवतापाचे (मलेरिया) अचूक निदान करण्यासाठी जिल्ह्यातील विविध आरोग्य संस्थांमध्ये कार्यरत असलेल्या प्रयोगशाळा वैज्ञानिक अधिकाऱ्यांसाठी दोन दिवसीय ‘मायक्रोस्कोप प्रशिक्षण’ कार्यशाळेचे आयोजन करण्यात आले होते. हे प्रशिक्षण ७ आणि ८ जानेवारी २०२६ रोजी हॉटेल लँडमार्क, गडचिरोली येथे यशस्वीरित्या संपन्न झाले.
प्रशिक्षणाचे आयोजन व समन्वय:
सदर प्रशिक्षण जिल्हा आरोग्य विभाग, गडचिरोली यांच्या समन्वयाने आणि CHRI व PATH फाउंडेशन यांच्या सहकार्याने आयोजित करण्यात आले होते. विशेष म्हणजे, या प्रशिक्षणासाठी ICMR (भारतीय आयुर्विज्ञान अनुसंधान परिषद), नवी दिल्ली येथील तज्ज्ञ प्रशिक्षक मार्गदर्शक म्हणून उपस्थित होते.
प्रमुख उपस्थिती व मार्गदर्शन:
सदर कार्यशाळा जिल्हाधिकारी मा. श्री. अविश्यांत पंडा यांच्या मार्गदर्शनाखाली पार पडली. यावेळी मुख्य कार्यकारी अधिकारी श्री. सुहास गाडे, जिल्हा आरोग्य अधिकारी डॉ. प्रताप शिंदे, जिल्हा शल्य चिकित्सक डॉ. वर्षा लहाडे आणि जिल्हा हिवताप अधिकारी डॉ. सुजिता वाडीये यांची प्रमुख उपस्थिती होती.
तज्ज्ञ मार्गदर्शक:
या प्रशिक्षणादरम्यान तांत्रिक बाबींवर सखोल मार्गदर्शन करण्यासाठी CHRI PATH चे वरिष्ठ तांत्रिक अधिकारी (Senior Technical Officer) डॉ. अमित गंभीर आणि CHRI च्या विभागीय समन्वयक डॉ. राखी शेंडे यांनी विशेष उपस्थिती दर्शवून उपस्थितांना मार्गदर्शन केले.
प्रशिक्षणाचे महत्व ;
दोन दिवसांच्या या सत्रात प्रयोगशाळा वैज्ञानिक अधिकाऱ्यांना मायक्रोस्कोपच्या माध्यमातून हिवतापाच्या परजीवींची अचूक ओळख पटवणे आणि निदानातील आधुनिक पद्धतींचे प्रशिक्षण देण्यात आले. ICMR दिल्लीच्या तज्ज्ञांच्या मार्गदर्शनामुळे जिल्ह्यातील आरोग्य यंत्रणेला हिवताप निर्मूलनाच्या कार्यात मोठी मदत होणार आहे.
अचूक निदानामुळे रुग्णांना वेळीच उपचार मिळतील आणि जिल्ह्यातील हिवतापाचे प्रमाण कमी करण्यास यश येईल, असा विश्वास आरोग्य विभागातर्फे व्यक्त करण्यात आला आहे.
डॉ प्रताप शिंदे
जिल्हा आरोग्य अधिकारी
जिल्हा परिषद गडचिरोली
