🔴 आलापल्ली वनपरिक्षेत्रात चौकशीदरम्यान कंत्राटदाराचा हस्तक्षेप? प्रश्नचिन्ह उपस्थित

🔴 आलापल्ली वनपरिक्षेत्रातील DPDC कामांची चौकशी सुरू; समितीत कंत्राटदाराचा हस्तक्षेप? वाद निर्माण

गडचिरोली : आलापल्ली ! जिल्हा नियोजन समिती, गडचिरोली यांच्या आदेशानुसार आलापल्ली वनपरिक्षेत्रात जिल्हा वार्षिक योजना (DPDC) अंतर्गत झालेल्या कामांबाबतच्या तक्रारींची चौकशी करण्यासाठी त्रिसदस्यीय समिती गठीत करण्यात आली आहे. मात्र, चौकशी प्रक्रिया सुरू असतानाच कंत्राटदाराच्या अनधिकृत उपस्थिती व हस्तक्षेपाच्या आरोपामुळे संपूर्ण प्रकरणावर प्रश्नचिन्ह निर्माण झाले आहे.

प्राप्त माहितीनुसार, वनपरिक्षेत्र अधिकारी (प्रादेशिक) आलापल्ली येथील श्री. गौरव गणवीर यांच्या कार्यकाळात (सन 2023-24 व 2024-25) आदिवासी उपयोजना (TSP) व सर्वसाधारण योजनेंतर्गत झालेल्या कामांबाबत विविध तक्रारी समोर आल्या होत्या. या तक्रारींची दखल घेत मुख्य वनसंरक्षक (प्रादेशिक) गडचिरोली यांच्या शिफारशीनंतर जिल्हा नियोजन समितीने चौकशीसाठी स्वतंत्र समिती गठीत करण्याचे आदेश निर्गमित केले.

या समितीत अहेरी येथील अतिरिक्त जिल्हाधिकारी श्री. संजय अस्वले (अध्यक्ष), नियोजन अधिकारी श्री. प्रफुल्ल पोरेड्डीवार (सदस्य) आणि जिल्हा नियोजन अधिकारी श्री. प्रसाद घाडगे (सदस्य सचिव) यांचा समावेश करण्यात आला आहे. समितीला संबंधित कामांची यादी तपासून प्राप्त तक्रारींची सखोल चौकशी करून एका आठवड्यात अहवाल सादर करण्याचे निर्देश देण्यात आले आहेत.

मात्र, चौकशीदरम्यान संबंधित कंत्राटदाराला कोणताही अधिकृत पत्रव्यवहार, नोटीस किंवा समन्स देण्यात आले नसतानाही तो समितीसमोर हजर राहून प्रक्रियेत हस्तक्षेप करत असल्याचा आरोप समोर आला आहे. यामुळे चौकशीच्या पारदर्शकतेवर गंभीर प्रश्न उपस्थित होत असून “चौकशी समितीत कंत्राटदाराचा सहभाग कशासाठी?” असा सवाल स्थानिक नागरिक व सामाजिक कार्यकर्त्यांकडून उपस्थित केला जात आहे.

तसेच, चौकशी प्रक्रियेत अशा प्रकारचा हस्तक्षेप हा नियमबाह्य असून संबंधितांना संरक्षण दिले जात असल्याचीही शंका व्यक्त होत आहे. त्यामुळे या संपूर्ण प्रकरणाची निष्पक्ष व पारदर्शक चौकशी करून दोषींवर कठोर कारवाई करण्याची मागणी जोर धरत आहे.

दरम्यान, या गंभीर आरोपांबाबत वनविभाग अथवा जिल्हा प्रशासनाकडून अद्याप अधिकृत प्रतिक्रिया देण्यात आलेली नाही. परिणामी, या प्रकरणाकडे सर्वांचे लक्ष लागले असून पुढील चौकशी अहवालात नेमके काय निष्पन्न होते याकडे नागरिकांचे लक्ष केंद्रित झाले आहे.