🟥 जिद्दीचा विजय! दुर्गम कोरेलीतील अनुश्री दुर्गेची NMMS परीक्षेत दैदिप्यमान कामगिरी

🟥 जिद्दीचा विजय! दुर्गम कोरेलीतील अनुश्री दुर्गेची NMMS परीक्षेत दैदिप्यमान कामगिरी

गडचिरोली | आर्थिकदृष्ट्या दुर्बल घटकांसाठी घेतल्या जाणाऱ्या राष्ट्रीय आर्थिक दुर्बल घटक शिष्यवृत्ती (NMMS) परीक्षेत आलापल्ली येथील राणी दुर्गावती विद्यालयाची विद्यार्थिनी अनुश्री रमेश दुर्गे हिने उल्लेखनीय यश संपादन करत शाळेसह संपूर्ण परिसराचा मान उंचावला आहे. तिच्या या यशामुळे ग्रामीण भागातील विद्यार्थ्यांमध्ये नव्या उमेदीची लाट निर्माण झाली असून सर्वत्र तिचे कौतुक होत आहे.

दुर्गम कोरेली (बुजुर्ग) गावातील साध्या कुटुंबातून आलेल्या अनुश्रीने अत्यंत मर्यादित साधनसामग्रीतून शिक्षण घेत, अनेक अडचणींवर मात करत हे यश मिळवले. प्रवासाच्या समस्या, शैक्षणिक सुविधांचा अभाव आणि घरची परिस्थिती या सर्व आव्हानांवर जिद्द, चिकाटी आणि आत्मविश्वासाच्या जोरावर मात करत तिने आपली क्षमता सिद्ध करून दाखवली. “मनात जिद्द असेल तर कोणतेही यश दूर नाही” हे तिने आपल्या कृतीतून दाखवून दिले आहे.

या यशामागे राणी दुर्गावती विद्यालयाचे मुख्याध्यापक मा. लोणबले सर यांचे मार्गदर्शन तसेच सर्व शिक्षकवृंदाचा मोलाचा वाटा आहे. विशेषतः NMMS विभागाची जबाबदारी सांभाळणारे मा. कारेंगुलवार सर व मा. पहापडे सर यांनी विद्यार्थ्यांमधील सुप्त गुण ओळखून त्यांना योग्य दिशा दिली. सातत्यपूर्ण सराव, नियोजनबद्ध मार्गदर्शन आणि प्रोत्साहनामुळेच अनुश्रीने ही उल्लेखनीय कामगिरी गाठली.

अनुश्रीचे प्राथमिक शिक्षण जि.प. उच्च प्राथमिक शाळा, कोरेली बुजुर्ग येथे झाले असून त्या शाळेचे मुख्याध्यापक श्री. संतोष चिकाटे यांनीही तिचे विशेष अभिनंदन केले आहे. तिच्या यशानिमित्त शाळेत तिचा सत्कार करण्यात आला असून पुष्पगुच्छ देऊन गौरव करण्यात आला.

अनुश्री दुर्गेचे हे यश केवळ वैयक्तिक नसून, ग्रामीण भागातील शिक्षण व्यवस्थेच्या सामर्थ्याचे प्रतीक ठरत आहे. तिच्या जिद्दीची ही प्रेरणादायी कहाणी अनेक विद्यार्थ्यांसाठी मार्गदर्शक ठरणार आहे.

👉 “स्वप्न मोठं असेल तर परिस्थिती लहान पडते” — अनुश्रीच्या यशाने दिला प्रेरणेचा संदेश!