📰 “कमलापूर महसूल शिबिरात 500 नागरिकांची उपस्थिती; 47 फेरफार निकाली, शेकडो लाभांचे वितरण”

📰 “कमलापूर महसूल शिबिरात 500 नागरिकांची उपस्थिती; 47 फेरफार निकाली, शेकडो लाभांचे वितरण”

📍गडचिरोली :(कमलापूर) अहेरी तालुक्यातील मौजा कमलापूर येथील श्री गुरुदेव आश्रम शाळेत महसूल मंडळस्तरीय ‘छत्रपती शिवाजी महाराज महाराजस्व समाधान शिबिर’ (टप्पा क्र. १) मोठ्या उत्साहात पार पडले. गुरुवार, 10 एप्रिल 2026 रोजी सकाळी 11 वाजता आयोजित या शिबिराला नागरिकांचा उत्स्फूर्त प्रतिसाद मिळाला.

या शिबिराच्या अध्यक्षस्थानी तहसीलदार अहेरी श्री. बालाजी सोमवंशी होते. प्रमुख अतिथी म्हणून नायब तहसीलदार कु. कल्पना सुरपाम, उपाधीक्षक भूमी अभिलेख कार्यालयाचे श्री रणदिवे, ग्रामपंचायत कमलापूरच्या सरपंच श्रीमती रजनीता मडावी, खांदला सरपंच श्रीमती सुमन आलाम, माजी सभापती श्रीमती रवीना गावडे, अन्नपुरवठा निरीक्षक श्री वैरागडे, मंडळ अधिकारी श्री पी. जी. गजभिये, तसेच पोलीस पाटील श्री भंडारवार आदी मान्यवर उपस्थित होते.

या शिबिरात महसूल, आरोग्य, कृषी, भूमी अभिलेख, अन्न व नागरी पुरवठा, संजय गांधी निराधार योजना, दुय्यम निबंधक कार्यालय, एकात्मिक बालविकास प्रकल्प तसेच वनविभाग अशा विविध शासकीय विभागांनी स्टॉल उभारून नागरिकांना योजनांची माहिती व प्रत्यक्ष लाभ उपलब्ध करून दिला.

तहसीलदारांनी शिबिरातील सर्व स्टॉलना भेट देत संबंधित अधिकाऱ्यांना दुर्गम भागातील नागरिकांपर्यंत योजनांचा लाभ पोहोचवण्याचे निर्देश दिले. महसूल मंडळ कमलापूरचे मंडळ अधिकारी श्री प्रवीण गजभिये व त्यांच्या टीमने अति दुर्गम गावांमध्ये जाऊन नागरिकांना शिबिरात सहभागी होण्यासाठी प्रोत्साहित केले. परिणामी तोंडेर, चिटवेली, नयनगुंडम, दामरंचा, भंगारामपेठा, राजाराम, खांदला आदी दुर्गम गावांतील शेतकरी मोठ्या संख्येने उपस्थित राहिले.

या शिबिरात सुमारे 400 ते 500 नागरिकांनी सहभाग नोंदविला. उपस्थितांसाठी जेवण व पिण्याच्या पाण्याचीही व्यवस्था करण्यात आली होती.

अध्यक्षीय भाषणात तहसीलदारांनी 25 मार्च 2026 च्या शासन निर्णयाची माहिती देत 1 जानेवारी 2011 पूर्वीच्या शासकीय जमिनीवरील अतिक्रमण नियमित करण्यासाठी 31 डिसेंबर 2026 पर्यंत अर्ज सादर करण्याचे आवाहन केले. या योजनेचा व्यापक प्रचार करण्याचे निर्देश ग्रामपंचायत व महसूल अधिकाऱ्यांना देण्यात आले.

कार्यक्रमाचे संचालन कु. अश्विनी गेडाम यांनी केले, तर आभार प्रदर्शन श्री विनायक लेखामी यांनी मानले. सायंकाळी 6 वाजता शिबिराची यशस्वी सांगता झाली.

दुर्गम भागातील नागरिकांना थेट शासकीय सेवांचा लाभ मिळवून देणारे हे शिबिर ‘शासन आपल्या दारी’ संकल्पनेचे प्रभावी उदाहरण ठरले.