📰 “शिक्षण आणि जनसेवा अखेरच्या श्वासापर्यंत!” – राजे अम्ब्रीशराव महाराजांचा निर्धार

राजे धर्मराव विद्यालयात पालक संपर्क मेळावा उत्साहात; सेवानिवृत्त शिक्षकांचा सन्मान

गडचिरोली : शिक्षणातून समाजपरिवर्तन घडवण्याचा ध्यास घेत “शैक्षणिक विकास आणि जनसेवा शेवटच्या श्वासापर्यंत सुरू ठेवू,” असा ठाम निर्धार माजी राज्यमंत्री राजे अम्ब्रीशराव महाराज यांनी व्यक्त केला. येथील राजे धर्मराव विद्यालयात आयोजित पालक संपर्क मेळावा व विद्यार्थी संवाद कार्यक्रमात ते बोलत होते.

कार्यक्रमाची सुरुवात विद्यार्थ्यांच्या उत्स्फूर्त स्वागताने झाली. यावेळी अहेरी इस्टेटचे राजे तथा माजी राज्यमंत्री राजे अम्ब्रीशराव महाराज अध्यक्षस्थानी होते, तर प्रमुख पाहुणे म्हणून कुमार अवधेशराव बाबा आत्राम यांची उपस्थिती लाभली. प्राचार्य गणेश तगरे, माजी शिक्षक, माजी मुख्याध्यापक व शैक्षणिक क्षेत्रातील मान्यवरही यावेळी उपस्थित होते.

आपल्या मार्गदर्शनपर भाषणात राजे महाराजांनी धर्मराव शिक्षण मंडळाच्या कार्याचा गौरव करत सांगितले की, कै. राजे विश्वेश्वरराव महाराज यांनी चंद्रपूर-गडचिरोली भागात शिक्षणाची मुहूर्तमेढ रोवली, तर कै. राजे सत्यवानराव महाराज यांनी त्या कार्याला व्यापक रूप दिले. “ही परंपरा पुढे नेताना आम्हीही समाजहितासाठी कटिबद्ध आहोत,” असे त्यांनी ठामपणे नमूद केले.
शाळेच्या प्रगतीबाबत बोलताना त्यांनी मुख्याध्यापक गणेश तगरे यांच्या नियोजनशक्ती, शिस्त आणि प्रामाणिकतेचे विशेष कौतुक केले. पालकांनी शाळेवरील विश्वास दृढ ठेवावा आणि विद्यार्थ्यांच्या समस्यांसाठी थेट शाळेशी संवाद साधावा, असे आवाहनही त्यांनी केले.

कार्यक्रमात सेवानिवृत्त शिक्षक रमणजी कोम्मेरा यांचा शाल, श्रीफळ आणि पुष्पगुच्छ देऊन भावपूर्ण सन्मान करण्यात आला. त्यांच्या दीर्घकाळाच्या शैक्षणिक सेवेला उपस्थितांनी दाद देत पुढील आयुष्यासाठी शुभेच्छा दिल्या.

कार्यक्रमाचे आभार प्रदर्शन प्राचार्य गणेश तगरे यांनी केले. या मेळाव्यास पालक, विद्यार्थी, शिक्षक-शिक्षिका, शिक्षकेत्तर कर्मचारी तसेच स्थानिक नागरिकांची मोठ्या संख्येने उपस्थिती लाभली.