गडचिरोली, दि. २३ — राज्याचे आदिवासी विकास मंत्री Dr. Ashok Uike हे शनिवार, दि. २५ एप्रिल रोजी गडचिरोली जिल्ह्याच्या दौऱ्यावर येत असून या दौऱ्यात शिक्षण व शेतकरी विषयक महत्त्वाच्या मुद्द्यांवर लक्ष केंद्रीत केले जाणार आहे. विशेषतः शासकीय आश्रमशाळांमधील नव्याने प्रवेशित विद्यार्थ्यांची संख्या वाढविण्यासाठी ठोस उपाययोजना आखण्यावर भर दिला जाणार आहे.
दौऱ्याच्या कार्यक्रमानुसार, मंत्री उईके यांचे सकाळी ८.३० वाजता शासकीय विश्रामगृह येथे आगमन होणार असून त्यानंतर सकाळी ९ वाजता धानोरा रोडवरील महाराजा सेलिब्रेशन हॉल येथे आयोजित कार्यशाळेत ते सहभागी होतील. या कार्यशाळेत आश्रमशाळांमधील प्रवेशवाढ, गुणवत्तापूर्ण शिक्षण आणि विद्यार्थ्यांना आकर्षित करण्यासाठी आवश्यक उपाययोजनांवर सविस्तर चर्चा होणार आहे.
यानंतर दुपारी १२.३० वाजता जिल्हाधिकारी कार्यालयात धान खरेदी प्रक्रियेच्या अनुषंगाने महत्त्वपूर्ण आढावा बैठक घेण्यात येणार आहे. या बैठकीत शेतकऱ्यांना वेळेत पैसे मिळणे, खरेदी प्रक्रियेतील अडचणी आणि व्यवस्थापन सुधारणा यावर चर्चा अपेक्षित आहे.
दरम्यान, सायंकाळी मंत्री उईके यांचे सोयीनुसार यवतमाळकडे प्रयाण होणार आहे. या दौऱ्यामुळे जिल्ह्यातील शिक्षण व कृषी व्यवस्थेला चालना मिळण्याची अपेक्षा व्यक्त केली जात आहे.
