📰 “दुर्गम अहेरीतून यशाची झेप! सुरजागड इस्पात–‘मियाम’च्या प्रशिक्षणातून तीन तरुण सरकारी सेवेत”

📰 “दुर्गम अहेरीतून यशाची झेप! सुरजागड इस्पात–‘मियाम’च्या प्रशिक्षणातून तीन तरुण सरकारी सेवेत”

📍गडचिरोली : दुर्गम, नक्षलग्रस्त आणि मर्यादित साधनसंपत्ती असलेल्या अहेरी उपविभागातील तरुणाई आता संघर्षाला झुगारून यशाची नवी वाट चोखाळताना दिसत आहे. जिद्द, कठोर परिश्रम आणि योग्य मार्गदर्शन यांच्या बळावर तीन विद्यार्थ्यांनी सरकारी नोकरी मिळवून आपल्या कुटुंबासह संपूर्ण परिसराचे नाव उज्ज्वल केले आहे.

सुरजागड इस्पात प्रायव्हेट लिमिटेड आणि मियाम चॅरिटेबल ट्रस्ट यांच्या संयुक्त विद्यमाने चालवल्या जाणाऱ्या प्रशिक्षण अकादमीमुळे या यशाला भक्कम आधार मिळाला आहे.

यामध्ये चिंतलपेठ येथील दिपाली भाऊराव चुनारकर, अकारपल्ली येथील वंदना भीमराव आत्राम आणि खमणचेरू येथील तिरुपती विकास मडावी या विद्यार्थ्यांचा समावेश आहे. त्यांच्या यशामुळे दुर्गम भागातील इतर तरुणांसाठीही प्रेरणेचा नवा किरण निर्माण झाला आहे.

संघर्षातून घडले यश
दिपाली चुनारकर हिची निवड कर्मचारी निवड आयोगामार्फत निमलष्करी दलात झाली आहे. अत्यंत साध्या परिस्थितीत किराणा दुकान चालवणाऱ्या कुटुंबातून येत असूनही तिने जिद्दीने अभ्यास व प्रशिक्षण सुरू ठेवले.

वंदना आत्राम आणि तिरुपती मडावी यांची गडचिरोली पोलीस दलात निवड झाली आहे. शेतमजूर कुटुंबातील वंदनाने कठीण परिस्थितीत शिक्षण पूर्ण केले, तर पदवीधर असूनही बेरोजगारीचा सामना करणाऱ्या तिरुपतीला या प्रशिक्षणामुळे नवी दिशा मिळाली.
‘हर घर नौकरी’चा संकल्प साकार

या उपक्रमाचा ‘हर घर नौकरी, जीवनभर रोशनी’ हा ध्येयवाक्य केवळ घोषवाक्य न राहता प्रत्यक्षात उतरल्याचे चित्र दिसून येत आहे. चिंतलपेठ येथे सुरू असलेल्या या मोफत अकादमीत विद्यार्थ्यांना शैक्षणिक तसेच शारीरिक प्रशिक्षण दिले जाते. यामध्ये पुस्तके, स्टेशनरी, गणवेश आणि प्रवासाची सुविधाही मोफत उपलब्ध करून दिली जाते.

तज्ज्ञांचे मार्गदर्शन, सर्वांगीण प्रशिक्षण
या अकादमीत यूपीएससी, एमपीएससी, पोलीस भरती, लष्कर आणि रेल्वे भरतीसाठी विद्यार्थ्यांना मार्गदर्शन केले जाते. निवृत्त पॅरा कमांडो सुमेर सिंग यांच्या मार्गदर्शनाखाली मैदानी प्रशिक्षण दिले जाते, तर गणित व सामान्य ज्ञानासाठी पंकज पोटे आणि महेश अलोने यांसारखे अनुभवी शिक्षक विद्यार्थ्यांना मार्गदर्शन करतात.

मियाम ट्रस्टच्या प्रमुख नितु जोशी यांनी सांगितले की, “दुर्गम भागातील तरुणांना योग्य दिशा आणि संधी मिळाल्यास ते निश्चितच मोठे यश संपादन करू शकतात. या उपक्रमातून स्थानिक तरुणांना रोजगाराच्या संधी उपलब्ध करून देणे हे आमचे उद्दिष्ट आहे.”

दुर्गम भागातील तरुणांच्या आयुष्यात आशेचा किरण ठरलेला हा उपक्रम ‘परिश्रम + प्रशिक्षण = यश’ या समीकरणाची साक्ष देत असून, गडचिरोलीत परिवर्तनाची नवी दिशा दाखवत आहे.