योग्य मोबदला, पुनर्वसनाची हमी; ‘लोह-पोलाद हब’कडे वाटचाल करताना शेतकरीहित प्रथम
गडचिरोली/नागपूर, दि. ४ : गडचिरोली जिल्ह्यात प्रस्तावित औद्योगिक प्रकल्पांसाठी जमीन संपादन करताना शेतकऱ्यांच्या हिताला कुठलाही धक्का बसू दिला जाणार नाही, असा ठाम शब्द मुख्यमंत्री Devendra Fadnavis यांनी दिला.
कोणत्याही परिस्थितीत शेतकऱ्यांवर जबरदस्ती केली जाणार नसून, स्वेच्छेने जमीन देणाऱ्यांना जास्तीत जास्त मोबदला व पुनर्वसनाची हमी दिली जाईल, असे त्यांनी स्पष्ट केले.
रामगिरी येथे आज गडचिरोलीचे आमदार Dr. Milind Narote यांच्या नेतृत्वाखाली चामोर्शी तालुक्यातील शेतकरी शिष्टमंडळाने मुख्यमंत्र्यांची भेट घेतली.
यावेळी सहपालकमंत्री Ashish Jaiswal यांच्यासह संबंधित अधिकारी उपस्थित होते.
मुख्यमंत्री म्हणाले की, गडचिरोली जिल्हा औद्योगिक विकासाच्या दिशेने झपाट्याने पुढे जात असून ‘लोह व पोलाद हब’ म्हणून उदयास येत आहे. मात्र, या विकास प्रक्रियेत शेतकऱ्यांवर अन्याय होणार नाही, याची शासन विशेष काळजी घेत आहे. जमीन संपादन करताना सर्व संबंधित घटकांशी सविस्तर चर्चा करून सामंजस्याने मध्यम मार्ग काढला जाईल, असे त्यांनी सांगितले.
उद्योगांच्या माध्यमातून स्थानिक युवकांसाठी मोठ्या प्रमाणात रोजगारनिर्मिती होणार असल्याचे त्यांनी अधोरेखित केले. जमिनी देणाऱ्या शेतकऱ्यांना केवळ योग्य मोबदला नव्हे, तर पुनर्वसनाची सुसंगत व समाधानकारक व्यवस्था केली जाईल, असेही त्यांनी स्पष्ट केले.
“विकास प्रक्रियेत सर्वांचा सहभाग महत्त्वाचा आहे. शेतकऱ्यांनी सकारात्मक भूमिका घेत शासनाला सहकार्य करावे,” असे आवाहनही त्यांनी यावेळी केले.
शासनाचा कोणताही हेतू बळजबरीने जमीन संपादन करण्याचा नसून, स्वेच्छेने पुढे येणाऱ्या शेतकऱ्यांना अधिकाधिक लाभ देण्यावर भर राहील. तसेच स्थानिक युवकांना रोजगार मिळावा यासाठी उद्योगांशी समन्वय साधून ठोस पावले उचलली जातील, अशी ग्वाही मुख्यमंत्री यांनी दिली.
