🟥 अत्याचार पीडितेची ओळख उघड करणाऱ्या पत्रकारावर गुन्हा; गडचिरोली पोलिसांची कडक कारवाई

🟥 अत्याचार पीडितेची ओळख उघड करणाऱ्या पत्रकारावर गुन्हा; गडचिरोली पोलिसांची कडक कारवाई

गडचिरोली | अत्याचार पीडितेची ओळख उघड करून पत्रकारितेच्या नैतिकतेला तिलांजली देणाऱ्या एका कथित पत्रकारावर गडचिरोली पोलिसांनी अखेर गुन्हा दाखल करत कडक कारवाई केली आहे. ‘महाराष्ट्र माझा न्यूज’ या वेब पोर्टलशी संबंधित कैलाश शर्मा याने पीडित मुलीचा फोटो प्रसिद्ध करून गंभीर कायद्याचे उल्लंघन केल्याचा आरोप आहे.

आरमोरी येथे ४ एप्रिल रोजी घडलेल्या संवेदनशील प्रकरणात संबंधित पत्रकाराने पीडितेची ओळख उघड होईल असा फोटो प्रसिद्ध केला. कायद्यानुसार अत्याचार पीडितेची ओळख उघड करणे हा गंभीर आणि दंडनीय गुन्हा असूनही केवळ प्रसिद्धीच्या हव्यासापोटी हे कृत्य केल्याने संतापाची लाट उसळली होती. या घटनेमुळे पीडित कुटुंबावर मानसिक आघात झाला असून समाजातून तीव्र निषेध व्यक्त करण्यात आला.

या प्रकरणी अखिल भारतीय आदिवासी विकास परिषदेने पोलीस अधीक्षकांकडे तक्रार दाखल करत कठोर कारवाईची मागणी केली होती. तसेच पीडितेच्या नातेवाईकांसह सामाजिक कार्यकर्त्यांनीही आक्रमक भूमिका घेतल्यानंतर पोलिसांनी तत्काळ हालचाली करत संबंधित पत्रकाराविरोधात विविध कलमान्वये गुन्हा नोंदवला आहे.

गडचिरोली पोलिसांच्या या कारवाईमुळे जिल्ह्यातील गैरप्रकार करणाऱ्या तथाकथित पत्रकारांमध्ये खळबळ उडाली आहे. अशा बेजबाबदार वर्तनामुळे खऱ्या पत्रकारांची प्रतिमा मलिन होत असल्याची भावना नागरिकांतून व्यक्त होत आहे.

दरम्यान, या प्रकरणातील आरोपीला अटक कधी होणार, याकडे सर्वांचे लक्ष लागले असून अशा प्रकारांना आळा घालण्यासाठी कठोर शिक्षा देण्याची मागणी जोर धरत आहे