Breaking News

🔴 आलापल्ली वनपरिक्षेत्रात कोट्यवधींच्या कामांवर प्रश्नचिन्ह; भ्रष्टाचाराच्या आरोपांनी खळबळ

May 4, 2026

🔴 आलापल्ली वनपरिक्षेत्रात कोट्यवधींच्या कामांवर प्रश्नचिन्ह; भ्रष्टाचाराच्या आरोपांनी खळबळ

गडचिरोली | आलापल्ली वनपरिक्षेत्रात जिल्हा वार्षिक योजना (DPDC), आदिवासी उपयोजना (ISP) व इतर योजनांअंतर्गत झालेल्या विकासकामांमध्ये मोठ्या प्रमाणात गैरव्यवहार, निकृष्ट दर्जा आणि अपूर्ण कामांचे गंभीर आरोप समोर आल्याने एकच खळबळ उडाली आहे. या प्रकरणी अखिल भारतीय भ्रष्टाचार निर्मूलन संघर्ष समितीने थेट जिल्हाधिकारी व मुख्य वनसंरक्षकांकडे तक्रार दाखल करून सखोल चौकशीची मागणी केली आहे.

समितीचे कार्यकारी अध्यक्ष तथा गडचिरोली जिल्हाध्यक्ष शंकर का. ढोलगे यांनी दिलेल्या निवेदनात २०२३-२४ व २०२४-२५ या कालावधीत झालेल्या कामांवर गंभीर आक्षेप नोंदवले आहेत. अनेक कामांमध्ये प्रत्यक्ष काम न करता बिलांची उचल, निकृष्ट दर्जाचे बांधकाम व अपूर्ण प्रकल्पांची नोंद असल्याचा आरोप करण्यात आला आहे.

📌 चौकशीवरही संशय सदर प्रकरणात सुरू असलेली चौकशीही पक्षपाती व अपूर्ण पद्धतीने होत असल्याचा आरोप समितीने केला आहे. प्रत्यक्ष स्थळ तपासणी न करता केवळ कागदोपत्री पडताळणी आणि फोटोसेशनवर भर दिला जात असल्याचे नमूद करण्यात आले आहे. तक्रारकर्त्यांकडे उपलब्ध असलेले महत्त्वाचे पुरावे चौकशीत विचारात घेतले जात नसल्याचेही सांगण्यात आले.

📌 कंत्राटदार हस्तक्षेपाचा आरोप चौकशी प्रक्रियेदरम्यान अधिकृत परवानगी नसताना संबंधित कंत्राटदाराचा हस्तक्षेप होत असल्याचा गंभीर आरोपही निवेदनात करण्यात आला आहे. तसेच चौकशी समितीत तांत्रिक तज्ज्ञांचा अभाव असल्याने कामांचे सखोल परीक्षण होत नसल्याची बाब पुढे आली आहे.

📌 दोषींना वाचवण्याचा प्रयत्न? या सर्व घडामोडींमुळे संबंधित अधिकाऱ्यांना वाचवण्याचा प्रयत्न होत असल्याची शंका व्यक्त करण्यात आली असून, शासनाच्या वित्तीय नियम व पारदर्शकतेच्या तत्त्वांना धक्का बसत असल्याचे समितीचे म्हणणे आहे.