🟥 गडचिरोलीच्या आरोग्य सेवेत नवा अध्याय; सेमाना येथे अत्याधुनिक ICU रुग्णवाहिकांचे लोकार्पण

आमदार डॉ. मिलिंद नरोटे यांच्या हस्ते जनसेवेत समर्पण; दुर्गम भागातील रुग्णांना मोठा दिलासा

गडचिरोली,  ___ : नक्षलग्रस्त व अतिदुर्गम भौगोलिक परिस्थितीमुळे आरोग्य सेवेसमोरील आव्हाने पेलणाऱ्या गडचिरोली जिल्ह्यासाठी आज एक महत्त्वाचा टप्पा गाठला गेला. सेमाना येथे राष्ट्रीय स्वयंसेवक संघाच्या सेवा प्रकल्पांतर्गत तसेच रिसर्च ऑर्गनायझेशन फॉर लिविंग एन्हान्समेंट (ROLE) यांच्या संयुक्त विद्यमाने दोन अत्याधुनिक ICU रुग्णवाहिकांचे लोकार्पण करण्यात आले. गडचिरोलीचे आमदार डॉ. मिलिंद नरोटे यांच्या हस्ते या रुग्णवाहिका जनसेवेत समर्पित करण्यात आल्या.

यावेळी बोलताना आमदार नरोटे म्हणाले की, गडचिरोलीसारख्या दुर्गम जिल्ह्यात गंभीर रुग्णांना मोठ्या शहरांमध्ये उपचारासाठी पोहोचवताना वेळेची शर्यत करावी लागते. अशा परिस्थितीत या ICU रुग्णवाहिका केवळ वाहतूक साधन नसून ‘फिरते रुग्णालय’ म्हणून कार्य करतील. व्हेंटिलेटर, कार्डियाक मॉनिटर, ऑक्सिजन सपोर्ट आणि अत्याधुनिक लाइफ सेव्हिंग उपकरणांनी सुसज्ज असलेल्या या रुग्णवाहिकांमुळे रुग्णांना प्रवासादरम्यानच तातडीचे उपचार मिळणार असून अनेक अमूल्य जीव वाचविण्यास मदत होणार आहे.

ग्रामीण व आदिवासी भागातील नागरिकांना दर्जेदार आरोग्य सुविधा उपलब्ध करून देणे ही आपली प्राथमिकता असल्याचे नमूद करत, सामाजिक बांधिलकी जपणाऱ्या संस्थांच्या सहभागामुळे जिल्ह्याच्या विकासाला नवे बळ मिळत असल्याचेही त्यांनी सांगितले.

या उपक्रमाबद्दल त्यांनी ROLE संस्थेचे व सर्व सेवाव्रतींचे विशेष आभार मानले. कार्यक्रमाला कोषाध्यक्ष हेमंत राठी, कृष्णा रेड्डी, डॉ. सुनील मडावी, जनजाति विकास समिती गडचिरोलीचे सचिव विकास वडेट्टीवार, सौरभ पुण्यापरेडीवार यांच्यासह अनेक मान्यवर उपस्थित होते.

या अत्याधुनिक ICU रुग्णवाहिकांच्या सेवेमुळे गडचिरोली जिल्ह्यातील आरोग्य व्यवस्थेत सकारात्मक बदल घडण्याची अपेक्षा व्यक्त होत असून दुर्गम भागातील रुग्णांना मोठा दिलासा मिळणार आहे.