🟥 अतिदुर्गम तुमरकोठी गाव उजळले! गडचिरोली पोलिसांच्या पुढाकाराने प्रथमच वीजपुरवठा सुरू

🟨 पोलीस–प्रशासनाच्या समन्वयातून विकासाला गती; नागरिकांना बल्ब व साहित्याचे मोफत वाटप

गडचिरोली, दि. 27 एप्रिल 2026 – माओवादग्रस्त व अतिदुर्गम म्हणून ओळखल्या जाणाऱ्या गडचिरोली जिल्ह्यातील हेडरी उपविभागातील मौजा तुमरकोठी गावात अखेर विकासाचा प्रकाश पोहोचला आहे. गडचिरोली पोलीस दलाच्या सातत्यपूर्ण प्रयत्नांमुळे आणि महाराष्ट्र राज्य विद्युत मंडळाच्या सहकार्याने आज गावात सुरळीतपणे विद्युत सेवा सुरू करण्यात आली. या ऐतिहासिक उपक्रमामुळे स्थानिक आदिवासी नागरिकांच्या जीवनमानात मोठी सुधारणा होणार असल्याचे चित्र आहे.

तुमरकोठी गावात 19 डिसेंबर 2025 रोजी नव्याने पोलीस स्टेशनची स्थापना करण्यात आल्यानंतर विकासाच्या दृष्टीने विविध उपक्रमांना वेग आला. दुर्गम भौगोलिक परिस्थिती, अपुरी वाहतूक व्यवस्था आणि सुरक्षा अडचणी असूनही पोलीस दलाने संबंधित विभागांशी समन्वय साधत गावात वीजपुरवठा सुरू करण्यात यश मिळवले.

वीजपुरवठा सुरू झाल्याने गावात आता प्रकाशाची सोय उपलब्ध झाली असून पिण्याच्या पाण्याची व्यवस्था सुलभ होणार आहे. विद्यार्थ्यांना अभ्यासासाठी आवश्यक सुविधा मिळणार असून नागरिकांच्या दैनंदिन जीवनात सकारात्मक बदल घडणार आहेत. यावेळी आयोजित कार्यक्रमात पोलीस दलाच्या वतीने नागरिकांना 100 बल्ब, 100 होल्डर, वायर व इतर आवश्यक साहित्य मोफत वितरित करण्यात आले.

पोलीस अधीक्षक श्री. एम. रमेश यांनी या उपक्रमामुळे शिक्षण, आरोग्य आणि जीवनमान उंचावण्यास मोठी मदत होईल, असा विश्वास व्यक्त केला. यापूर्वीही गडचिरोली पोलीस दलाच्या प्रयत्नातून 16 जुलै 2025 रोजी मरकणार–अहेरी मार्ग सुरू करण्यात आला होता, तसेच 17 मार्च 2026 रोजी स्वातंत्र्यानंतर प्रथमच तुमरकोठी–अहेरी बससेवा सुरू झाली. याशिवाय 28 फेब्रुवारी 2026 रोजी आयोजित आरोग्य मेळाव्यात 200 हून अधिक नागरिकांना लाभ देण्यात आला होता.

जिल्ह्यात दळणवळण सुलभ करण्यासाठी पोलीस संरक्षणात 559 मोबाईल टॉवर्स उभारण्यात आले असून 424 किलोमीटर रस्ते आणि 65 पुलांचे बांधकाम पूर्ण झाले आहे. या सर्व उपक्रमांमुळे प्रशासन आणि नागरिकांमधील विश्वास अधिक दृढ होत असून दुर्गम भागातील नागरिकांना मुख्य प्रवाहात आणण्यास मोठी मदत होत आहे.

सदर उपक्रम पोलीस अधीक्षक श्री. एम. रमेश, अपर पोलीस अधीक्षक (अभियान) श्री. कार्तिक मधीरा, अपर पोलीस अधीक्षक (प्रशासन) श्री. गोकुल राज, पोलीस उपअधीक्षक श्री. विशाल नागरगोजे व उपविभागीय पोलीस अधिकारी श्री. योगेश रांजणकर यांच्या मार्गदर्शनाखाली सीआरपीएफ 191 बटालियन आणि स्थानिक पोलीस अधिकाऱ्यांच्या संयुक्त प्रयत्नातून यशस्वीरीत्या पार पडला.