🟥 पावसाळ्यापूर्वी धान उचल पूर्ण करा; नुकसान टाळण्यासाठी कडक निर्देश – डॉ. अशोक उईके

🟥 पावसाळ्यापूर्वी धान उचल पूर्ण करा; नुकसान टाळण्यासाठी कडक निर्देश – डॉ. अशोक उईके

📍 गडचिरोली, दि. २५ उघड्यावर साठवलेले धान प्राधान्याने मिलर्सकडे वर्ग करीत पावसाळ्यापूर्वी संपूर्ण धान उचल पूर्ण करण्याचे आदेश आदिवासी विकास मंत्री डॉ. अशोक उईके यांनी दिले. “कोणत्याही परिस्थितीत धानाचे नुकसान होऊ देणार नाही,” असा स्पष्ट इशारा देत त्यांनी संबंधित यंत्रणांना काटेकोर नियोजन करण्याचे निर्देश दिले.

महाराष्ट्र राज्य सहकारी आदिवासी विकास महामंडळामार्फत सुरू असलेल्या धान खरेदी प्रक्रियेचा आढावा घेण्यासाठी आयोजित बैठकीत ते बोलत होते. बैठकीस आदिवासी विकास विभागाचे सचिव विजय वाघमारे, जिल्हाधिकारी अविश्यंत पंडा, आमदार डॉ. मिलिंद नरोटे, आदिवासी आयुक्त लीना बनसोड यांच्यासह विविध अधिकारी उपस्थित होते.

🔴 जीपीएसशिवाय वाहतूक नाही

धान वाहतुकीत पारदर्शकता राखण्यासाठी केंद्र शासनाच्या नियमानुसार 100 टक्के जीपीएस प्रणाली अनिवार्य असल्याचे मंत्री उईके यांनी स्पष्ट केले. “या बाबतीत कोणतीही तडजोड केली जाणार नाही,” असा ठाम इशारा देत त्यांनी संपूर्ण वाहतूक यंत्रणा नियंत्रणात ठेवण्यावर भर दिला.

🟡 गोदामांची कमतरता दूर करण्याचे आदेश

धान साठवणुकीसाठी आवश्यक गोदामांची कमतरता लवकरात लवकर दूर करून साठवण क्षमता वाढवावी, असे निर्देश देण्यात आले. पावसाळ्यात धान भिजून नुकसान होऊ नये यासाठी तातडीने उपाययोजना करण्यावर त्यांनी भर दिला.

🟢 शेतकरी नोंदणी व ई-पीक पाहणीवर भर

नोंदणीकृत प्रत्येक शेतकऱ्याचा धान खरेदी प्रक्रियेत सहभाग सुनिश्चित करण्याचे आदेश देत वनपट्टाधारकांची ऑनलाईन नोंदणी पूर्ण करणे, तसेच ई-पीक पाहणी 100 टक्के पूर्ण करण्यासाठी विशेष मोहीम राबवण्याच्या सूचना देण्यात आल्या. सोसायट्यांमार्फत व्यापक जनजागृती करण्यावरही भर देण्यात आला.

🔵 मिलर्सच्या अडचणींवर चर्चा

राईस मिल असोसिएशनच्या प्रतिनिधींनी धान उताऱ्यात मोठी तफावत असल्याचे निदर्शनास आणले. केंद्राच्या निकषानुसार 67 टक्के अपेक्षित असताना प्रत्यक्षात 52 ते 54 टक्के उतारा मिळत असल्याने नुकसान होत असल्याची तक्रार करण्यात आली. तसेच वाहतूक, हमाली आणि गोदाम उपलब्धतेबाबतच्या अडचणीही मांडण्यात आल्या. यावर संबंधित विभागांनी समन्वय साधून तातडीने उपाययोजना करण्याचे निर्देश देण्यात आले.

🟣 लाभार्थ्यांशी संवाद, स्वयंरोजगाराचे कौतुक

बैठकीनंतर डॉ. उईके यांनी शबरी आदिवासी विकास महामंडळाच्या कर्ज योजनांचा लाभ घेतलेल्या लाभार्थ्यांशी संवाद साधला. त्यांनी सुरू केलेल्या स्वयंरोजगार उपक्रमांचे कौतुक करत अशा योजनांचा अधिकाधिक लाभ घेण्याचे आवाहन केले.

👉 पावसाळ्यापूर्वी धान उचल पूर्ण करून शेतकऱ्यांचे नुकसान टाळणे हे प्रशासनाचे सर्वोच्च प्राधान्य असल्याचे स्पष्ट करत, सर्व यंत्रणांनी समन्वयाने काम करावे, असे आवाहन मंत्री डॉ. अशोक उईके यांनी केले.