🟥 “कारवाफा आरोग्य केंद्रात घाण-चिखलाचा साम्राज्य! आमदार डॉ. मिलिंद नरोटे संतापले; प्रशासनाला सुनावले कडक शब्द”

🟨 आकस्मिक भेटीत उघड झाली आरोग्य व्यवस्थेची दयनीय स्थिती; तात्काळ सुधारणा न केल्यास कारवाईचा इशारा

गडचिरोली : धानोरा तालुक्यातील कारवाफा येथील प्राथमिक आरोग्य केंद्राची अवस्था अत्यंत चिंताजनक असल्याचे समोर आले असून, गडचिरोली विधानसभा क्षेत्राचे आमदार डॉ. मिलिंद नरोटे यांच्या आकस्मिक भेटीत आरोग्य व्यवस्थेतील गंभीर त्रुटींचा पर्दाफाश झाला. केंद्रातील अस्वच्छता, सांडपाण्याची अयोग्य विल्हेवाट आणि निष्काळजी कारभार पाहून आमदारांनी तीव्र नाराजी व्यक्त करत प्रशासनाचे चांगलेच कान टोचले.

आरोग्य केंद्रातील विविध विभागांची पाहणी करताना आमदारांनी औषध साठा, रुग्णांसाठी उपलब्ध सुविधा आणि आपत्कालीन सेवांची माहिती घेतली. ग्रामीण भागातील नागरिकांना दर्जेदार व वेळेवर उपचार मिळणे हा त्यांचा हक्क असल्याचे त्यांनी ठणकावून सांगितले. औषध पुरवठ्यात कोणतीही कमतरता राहू नये, अशा स्पष्ट सूचना त्यांनी वैद्यकीय अधिकाऱ्यांना दिल्या.

🟥 अस्वच्छतेवर संताप व्यक्त
पाहणीदरम्यान पिण्याच्या पाण्याच्या वॉटर कुलर परिसरात सांडपाण्यामुळे मोठ्या प्रमाणात चिखल आणि घाण साचलेली दिसून आली. या अस्वच्छतेमुळे रुग्णांच्या आरोग्यावर गंभीर परिणाम होऊ शकतो, असे सांगत आमदारांनी प्रशासनाच्या निष्काळजीपणावर जोरदार टीका केली.

“आरोग्य केंद्रच जर अस्वच्छ असेल, तर रुग्णांच्या सुरक्षिततेचे काय?” असा थेट सवाल त्यांनी उपस्थित केला.

🟨 तातडीच्या उपाययोजनांचे आदेश
या गंभीर प्रकाराची दखल घेत आमदारांनी वॉटर कुलरजवळील सांडपाण्याची तातडीने विल्हेवाट लावण्यासाठी ड्रेनेज व्यवस्था दुरुस्त करण्याचे आदेश दिले. तसेच संपूर्ण आरोग्य केंद्र परिसर स्वच्छ व निर्जंतुक ठेवण्याच्या कडक सूचना देण्यात आल्या. येत्या काही दिवसांत परिस्थिती सुधारली नाही तर कठोर कारवाई केली जाईल, असा इशाराही त्यांनी दिला.
या दौऱ्यावेळी स्थानिक लोकप्रतिनिधी, आरोग्य विभागाचे अधिकारी व कर्मचारी उपस्थित होते.

आमदारांच्या या धडक कारवाईमुळे कारवाफा परिसरातील नागरिकांमध्ये समाधान व्यक्त होत असून, आता आरोग्य केंद्राची परिस्थिती सुधारेल अशी अपेक्षा व्यक्त केली जात आहे.