🚨 अहेरीत मोठी कारवाई : 3.44 लाखांची देशी दारू जप्त, चालक फरार!

🚨 अहेरीत मोठी कारवाई : 3.44 लाखांची देशी दारू जप्त, चालक फरार!

अहेरी (जि. गडचिरोली) : अहेरी पोलीस ठाण्याच्या पथकाने मोजा इंदाराम जंगल परिसरात धाडसी कारवाई करत मोठ्या प्रमाणात अवैध देशी दारू जप्त केली. या कारवाईत तब्बल ३ लाख ४४ हजार रुपयांचा मुद्देमाल आणि ४ लाख रुपये किमतीचे बोलेरो वाहन हस्तगत करण्यात आले असून, वाहन चालक मात्र जंगलाचं फायदा घेत फरार झाला आहे.

दि. ३१ मार्च २०२६ रोजी सायंकाळी ४.३० ते ५.४५ वाजण्याच्या सुमारास, पोलीस पथक पेट्रोलिंग करत असताना मिळालेल्या गोपनीय माहितीनुसार आलापल्ली-सिरोंचा मार्गावरील पुलाजवळ संशयित बोलेरो वाहन आढळून आले. पोलिसांनी थांबवण्याचा प्रयत्न करताच चालकाने वाहन जंगलाच्या दिशेने पळवले आणि पसार झाला.

यानंतर पंचासमक्ष वाहनाची तपासणी करण्यात आली असता, ‘रॉकेट संत्रा’ कंपनीची ९० एमएल मापाची देशी दारू मोठ्या प्रमाणात आढळून आली. एकूण ४३ खोक्यांमध्ये ४३०० सीलबंद निपा जप्त करण्यात आले असून, प्रत्येक निपाची किंमत ८० रुपये असल्याचे सांगण्यात आले.

जप्त करण्यात आलेले वाहन महिंद्रा बोलेरो (एमएच ४० सीए १७७२) असून, त्याची किंमत अंदाजे ४ लाख रुपये आहे. या प्रकरणी अज्ञात वाहन चालकाविरुद्ध अप.क्र. १०२/२०२६, कलम ६५(अ) महादाका अंतर्गत गुन्हा दाखल करण्यात आला आहे.

ही कारवाई पोलीस निरीक्षक हर्षल व्ही. ऐकरे यांच्या मार्गदर्शनाखाली पार पडली. तर पुढील तपास पोउपनि चैतन्य घावटे करत असून, गुन्हा दाखल करण्याचे काम मपोना मनीषा मुलकावार यांनी केले आहे.
पोलीसांकडून फरार आरोपीचा शोध सुरू असून, या कारवाईमुळे अवैध दारू तस्करीला मोठा आळा बसणार असल्याची चर्चा परिसरात आहे.